22:34 14-08-2021
news_image
265
FUTBOL

"Bizi çempionluğa iddialı görürsüzsə, çox sağ olun" - Ayxan Abbasov

"Yeni mövsümün startı münasibətilə hər kəsi təbrik edirəm. Darıxmışdıq. Azarkeşlərə icazə verildiyi üçün təşəkkür edirəm. Futbolun bəzəyi onlardır".

Apasport.az saytının məlumatına görə, bunu “Sumqayıt”ın baş məşqçisi Ayxan Abbasov Azərbaycan Premyer Liqasının I turunda “Keşlə” ilə keçirilən oyundan sonra deyib.

“ASK Arena”da baş tutan qarşılaşmada “gənclik şəhəri” təmsilçisi Rəhim Sadıxovun dublu sayəsində 2:0 hesablı qələbə qazanıb.

Oyunsonrası mətbuat konfransında Abbasov komandasının çıxışını dəyərləndirib: “Bu qələbə münasibətilə azarkeşlərimizi və komandamı təbrik edirəm. Səfərdə qələbə ilə başlamaq önəmli idi. Hər iki komandanın bu gün epizodları oldu. Çempionatın əvvəlidir, gərginlik də var idi. İki tur belə ağır keçəcək. Futbolçulara da demişəm, artırmalıyıq, fərqli olmalıyıq. Yolumuza davam edirik".

- Aydın Bayramovun durumu nə yerdədir?
- Ümid edirəm ki, ciddi zədə deyil. Rəqiblə toqquşdu dizindən zədə aldı.

- İlk oyundan sonra hansı çatışmazlıqları gördüz və rəhbərlikdən yeni oyunçu istəyəcəksizmi?
- Bizdə hər mətbuat konfransında transferlə bağlı sual vermək dəb halını alıb. Ala bilsək alacağıq, ala bilməsək, bu oyunçularla yolumuza davam edəcəyik. İstərdim, desinlər ki, Ayxan müəllim, təbrik edirəm, Konfrans Liqasında 3 gənc oyunçu oynatdınız. Bəzi dırnaqarası "professorlar" deyir ki, "Çukariçki"ni keçməli idiniz. Bizim də 11-12 legionerimiz olsaydı, o zaman nəsə demək olardı.

- "Sumqayıt" son vaxtlar "Keşlə"yə yeganə məğlubiyyəti ölkə kubokunun finalında alıb. Bu, həmin görüşün məsuliyyətindən qaynaqlanırdı?
- Əlbəttə. Həmin gün "Keşlə" bizdən daha istəkli oldu. Rəqibə heç bir məqamda uduzmadıq. Belə matçlarda bəzi futbolçular üzə çıxmalıdırlar. Rəqibdə Sezar Meza Kolli kimi futbolçu var idi. Bizdə bu gün Rəhim Sadıxov bu funksiyanı icra edir. Bizdə o, Əli Qurbani belə məqamlarda üzə çıxmağa başlayırlar.

- Adətən Murad Xaçayevlə matça başlayırsız. Bu gün Elvin Məmmədovun start heyətində yer alması nə ilə bağlı idi?
- Komandada rəqabət olmasını xoşlayıram. Sabah tam başqa heyət ola bilər. Elvinin məşqdəki performansı bizi qane edirdi. Limit məsələsi də var. Limit də bizə sıxıntı yaratmır. Bizdə 2004-cü il təvəllüdlü futbolçu var. Belə şeyləri çempionatın əvvəlində düşünmək lazımdır. Biz də düşünmüşük.

- Belə düşüncə var ki, komanda çempion ola bilməyibsə, problem var. Ötən mövsümdən fərqli cari çempionatda hansısa dəyişikliklər etmisiz?
- Biz çempion olmalı idik? Mən bu fikirlə razı deyiləm. Bu sualı iddialı klublara vermək olar. Bizi çempionluğa iddialı görürsüzsə, çox sağ olun. Heyəti qorumaqda məqsədimiz budur ki, futbolçular daha çox oynamalıdırlar. Çempionatımız çox çətindir. Heyət geniş olmalıdır. 1-3 məğlubiyyətlə deyə bilmərsən ki, komanda hazır deyil. Bizim məqsədimiz fərqlidir. Avropaya, güclü komandalara oyunçular vermək istəyirik. Xəyal Nəcəfovun "Neftçi"yə gedişi bizə pul qazandırdı. Həmin pulla işlər görüldü. Çempion olmaq üçün nələr-nələr lazımdır. Bəzi liqalarda sürpriz çempion olur. Məsələn, "Lids" kimi. Amma növbəti mövsüm görürsən ki, bu, çempionluq komanda deyil.

- Rəhim Sadıxovun adı "Qarabağ"la hallanır. Bununla bağlı təklif almısız?
- Xeyr, bizə təklif olmayıb. Onu satmaq fikrimiz yoxdur. Gərək elə təklif olsun ki, fikrimizdən daşındıra bilsinlər.