17:38 01-10-2021
news_image
160
DİGƏR NÖVLƏR

AMADA 2020-ci ildəki fəaliyyətinə dair hesabat jurnalı dərc etdi

Azərbaycan Milli Antidopinq Agentliyi (AMADA) 2020-ci il ərzindəki fəaliyyətinə dair ətraflı məlumatların yer aldığı hesabat jurnalı dərc edib.

Apasport.az saytının məlumatına görə, bildirilib ki, ötən il COVID-19 pandemiyası bütün sahələrə olduğu kimi dopinq nəzarəti sahəsinə də öz təsirini göstərib.

Hesabatda vurğulanıb ki, pandemiyanın gətirdiyi məhdudiyyətlər və yaratdığı reallıqlar əvvəlki illərlə müqayisədə tamamilə yeni və fərqli şərait yaradıb: “Elə buna görə də AMADA 2020-ci ildə fəaliyyətini pandemiyanın yaratdığı reallıqlar əsasında qurub, tətbiq olunan məhdudiyyətləri nəzərə alaraq fəliyyətinin davamlılığını və effektivliyini təmin etmək üçün çevik qərarlar qəbul edib. Qabaqcıl təcrübələrin və innovativ üsulların tətbiqinə hər zaman xüsusi əhəmiyyət verən AMADA bu istiqamətdə öz fəaliyyətini daha da təkmilləşdirmişdir. Dopinq nəzarəti testlərinin götürülməsi prosesi idmançıların və nümunə toplama heyətinin təhlükəsizliyinin təmin olunması məqsədilə tələblərə tam uyğun şəkildə həyata keçirilib. Dopinq nəzarətinin ən mühüm vasitələrindən olan antidopinq maarifləndirməsi əsasən distant üsulla olmaqla fasiləsiz təşkil edilib. Hesabat ilində maarifləndirmə işlərində Ümumdünya Antidopinq Məcəlləsinin tətbiqi ilə bağlı məsələlər xüsusi yer tutub və AMADA bununla bağlı üzərinə düşən öhdəlikləri əvvəlcədən hazırlanan mərhələli proqram əsasında tam və vaxtında icra edib”.

AMADA keçən il qlobal antidopinq hərəkatında da aktiv iştirak edərək bir sıra beynəlxalq layihələri uğurla həyata keçirdiyini, beynəlxalq tərəfdaşlarla keçirilən çoxsaylı görüşlər, imzalanan müqavilələrlə əməkdaşlığı daha da genişləndirdiyinin yayıb. Həmçinin Vətən müharibəsi dönəmində görülən işlər barədə məlumat verilib: “2020-ci il Azərbaycan üçün həm də zəfər ili kimi tarixə düşüb. Vətən müharibəsində əldə edilən şanlı qələbə eyni zamanda ədalətin yenidən bərqərar olması idi. AMADA Vətən müharibəsində əldə etdiyimiz  böyük zəfərə kiçik də olsa töhfə vermək üçün müxtəlif  yardım və təbliğat tədbirləri həyata keçirib. Göründüyü kimi, 2020-ci il dünya və Azərbaycan üçün mənfi və müsbət hadisələri ilə yaddaqalan və fərqli olub. AMADA bu il ərzindəki fəaliyyətində innovativ və qabaqcıl yanaşmaları tətbiq edərək fərq yaratmağa çalışıb. Elə buna görə də, 2020-ci ilin yekunlarına həsr olunmuş hesabat  “Fərqli” adlandırılıb. AMADA-nın fəaliyyəti ilə bağlı ətraflı və təfərrüatlı məlumatların yer aldığı hesabat jurnalının elektron versiyası Azərbaycan və ingilis dillərində AMADA-nın rəsmi internet saytında yerləşdirilib”.