15:43 06-10-2021
news_image
375
FUTBOL

Kevin Medina: “Əsas liderimiz odur”

“Mövsümə uğurlu başlamağımızın səbəbini yaydakı təlim-məşq toplanışı ilə əlaqələndirmək olar. Toplanışı yaxşı keçirtmişdik və yüksələn xətt üzrə inkişafımız göz önündədir”.

Apasport.az saytının məlumatına görə, bunu “Qarabağ”ın müdafiəçisi Kevin Medina deyib.

Klubun rəsmi saytına açıqlama verən kolumbiyalı futbolçu komandanın Konfrans Liqası və Azərbaycan Premyer Liqasındakı çıxışı barədə danışıb. O, oyundan-oyuna performanslarını artırdıqlarını söyləyib: “Mövsümə yaxşı başlamağımızı daha çox bununla əlaqələndirirəm. Konfrans Liqasının təsnifat oyunlarını uğurlu adladıq və qrup mərhələsinə vəsiqə qazandıq. Qrup mərhələsinə də yaxşı başladıq. Yeni turnirdə tarix yazmaq istəyirik, bizim istəyimiz budur. Yerimizdə saya bilmərik, çox çalışmalıyıq və bunu komandanın hər bir üzvü başa düşür”.

Premyer Liqada turnir cədvəlinə başçılıq etmələrinə də toxunan 28 yaşlı mərkəz müdafiəçisi işlərinin yaxşı getdiyini vurğulayıb: “Ümumiyyətlə, doğru yolda olduğumuzu düşünürəm. Məqsədimiz çempion olmaqdır. Çalışacağıq ki, ötən mövsün buraxdığımız səhvləri təkrarlamayaq və bundan dərs çıxaraq. Premyer Liqada 1-ci olub, Çempionlar Liqasının təsnifat mərhələsində çıxış etmək istəyirik. Bu turnirdə iştirak etmək həm “Qarabağ”ın, həm də azarkeşlərimizin istəyidir. “Qarabağ” böyük turnirlərə yaraşan komandadır. Çempionatda asan rəqib yoxdur. Onların da hədəfləri var və buna görə çalışırlar. Lakin bizim də məqsədimiz çempionluqdur və bu arzu dəyişmir”.

Medina həmçinin öz oyununu da dəyərləndirib: “Ötən mövsümlə müqayisədə özümü daha çox inamlı hiss edirəm və oyunumda inkişaf görürəm. Bəzi çatışmazlıqlarım var idi və keyfiyyətlərimi artırmaqla komanda yoldaşlarıma kömək etməyə çalışıram. Bu şəkildə müdafiə xəttində etibarlılıq artır, bunun fərqindəyəm. Məqsədim daha inkişaf etmək və səviyyəmi artırmaqdır. Bu yolla komanda yoldaşlarıma daha çox kömək etmək istəyirəm”.

Ağdam klubunun aparıcı üzvü komandanın öz-dəst xəttinin olduğunu deyib: “Qarabağ”ı tanıyan hər kəs məqsədlərimizi də bilir. Bizim öz dəst-xəttimiz var. Bunun da əsas pay sahibi baş məşqçimiz Qurban Qurbanovdur. Komandamızın əsas lideri odur. O, hər birimizdən potensialımızdan maksimum istifadə etməyimizi istəyir və buna da nail olur. Komandamızın uğurlarının əsas faktorları da budur”.