23:14 27-10-2021
news_image
133
FUTBOL

David Qustavo: “Azərbaycan mənim üçün maraqlıdır” - MÜSAHİBƏ

UEFA Çempionlar Liqasının əsas mərhələsində sabah “Uraqan”la qarşılaşacaq “Araz-Naxçıvan” bu gün oyunun keçiriləcəyi zalda son məşqini keçirib. 

Apasport.az xəbər verir ki, təxminən 1 saat davam edən hazırlıq prosesindən sonra təmsilçimizin son transferi David Qustavo azfutzal.az-a müsahibə verib.
 
-  Karyeranız haqda qısa hansı məlumatları vermək istərdiz?
- Braziliya Birinci Liqasında başladım. 4 il bu liqada iştirak etdim. Daha sonra Avropaya yollandım. Belçikanın “Hallo-Gooik” klubunda çıxış etdim. Ardınca Fransanın “Monpele” komandasının da formasını geyindim. Növbəti dayanacağım fərqli qitə oldu. Belə ki, Qətər klublarından birindən gələn təklifi dəyərləndirdim.

- Amma beynəlxalq oyunlarda iştirak etməmisiz?
- Xeyr. İlk dəfə UEFA Çempionlar Liqasında mübarizə aparacam. Əlbəttə, buna görə sevinirəm. İdmançı üçün beynəlxalq oyunlarda iştirak etmək, uğur qazanmaq əvəzolunmaz hisslərdir. Ümid edirəm ki, mənim də siftəm uğurla yadda qalacaq və karyeramda yaxşı bir təcrübə olacaq.

- Təxminən 20 gündür “Araz-Naxçıvan”ın düşərgəsindəsiz. Uyğunlaşa bilmisiz?
- Əlbəttə, bunun öhdəsindən gəldiyimi deyə bilərəm. Çünki əla kollektivimiz var. Hər keçən gün bir-birimizi daha yaxşı başa düşürük. Həm də peşəkarlarla işləmək, bir komandada yer almaq çətinlik yaratmır. Baş məşqçi və heyətdə bir neçə həmyerlim var. Bu amil də mənə xeyli kömək edir.

- Azərbaycan təmsilçisindən təklif alana qədər ölkəmiz haqda məlumatlı idiz?
- Açığını deyim, yox. Amma artıq buradayam və buna görə də peşman deyiləm. Ölkəniz mənim üçün maraqlıdır. Gözəl şəhəriniz var, mətbəxiniz zəngin və dadlıdır, insanlarınız aqressiv deyil. Həm də burada braziliyalı futzalçıların olması da seçimimə təsir etdi. Çünki dil, ünsiyyət problemim yoxdur. İngilis dilini bilməyim də işimə yarıyır.

- Mətbəximizdən hansı yeməyi bəyənmisiz?
- Kababı çox sevirəm. Xüsusilə də lülə kababı. Qətərdə oynayan vaxt orada da bu kababdan yemişdim. Amma sizdə bir qədər fərqli bişirirlər. Burada yediyim daha dadlıdır.  

- Bakını da gəzməyə vaxt tapmısız..
- Bəli, gəzmişəm, çoxlu şəkillər çəkdirmişəm. Həmin şəkilləri ailəmə də göndərdim, onlar bu cür gözəl şəhərdə yaşadığıma görə çox sevinirlər. Həqiqətən də düşündüyümdən daha yaxşı şəhər gördum. İnternetdən də müəyyən bilgilər əldə etmişdim. Əyani görmək isə bir başqadır.

- Qayıdaq Çempionlar Liqasına. Qrupumuz haqda nə düşünürsüz?
- Çətin qrupda yer almışıq. İşimiz heç də asan olmayacaq. Ancaq komanda yoldaşlarım əvvəlki mərhələdə yaxşı iş görüblər. Həmin uğurun davamını gətirməliyik. Bunun üçün də hər oyuna yüz faiz məsuliyyətlə, ürəklə yanaşmalıyıq. Bu cür olacağına əminəm. Komanda yoldaşlarıma inanıram və yekun nəticənin bizi sevindirəcəyinə ümidliyəm.

- Start “Uraqan”la olacaq. Bu komandanın oyununu izləmisizmi?
- “Xerson”la son turda keçirdikləri matça baxdıq. Fərqli taktika ilə oynayırlar. Fiziki planda güclüdürlər. Fərdi keyfiyyətlərinə görə seçilən futzalçıları var. Amma mübarizə aparmaq, sərfəli nəticə qazanmaq mümkündür.

- Amma oyuna ciddi itkilərlə çıxacağıq.
- Təəssüf ki, Rizvan, İsaq bizə kömək edə bilməyəcək. Xətai də ilk oyunda meydana çıxmayacaq. Əlbəttə, hər bir oyunçunun yoxluğu komanda üçün itkidir. Lakin elə etməliyik ki, onların yoxluğu aşkar şəkildə görünməsin. Heyətimizdə rotasiya etmək üçün futzalçılar var. Baş məşqçimizin də müəyyən planları var. Bura gəlmişiksə, əli boş dönməməliyik.

- Oyunun keçiriləcəyi zalda ilk məşq necə alındı?
- Yol yorğunluğuna baxmayaraq yaxşı məşq etdik. Örtük yaxşıdır, elə sabah oynayacağımız top da xoşuma gəldi. Uşaqlar çox istəklidirlər. Qalır bu istəyi meydanda göstərmək və nəticəyə çevirmək. Bunu bacaracağıq.

- Şansımız necə faizdir?
- 60 faiz dəyərləndirərdim. Bu ümumi qrupun yekun nəticəsi ilə bağlıdır.