17:26 08-11-2021
news_image

Dünya üçüncüsü: “Bir nömrəyə çevriləcəyəm”

“Dünya çempionatına komandamız yaxşı hazırlaşmışdı. Hər birimiz özümüzə inanırdıq. Məhz bu inamın nəticəsində komanda hesabında 6-cı yeri tutduq. Bu çox böyük nailiyyətdir”.

Apasport.az saytının məlumatına görə, bunu Belqradda keçirilən boks üzrə dünya çempionatında bürünc medal qazanan Azərbaycan millisinin üzvü Sərxan Əliyev deyib.

71 kq çəki dərəcəsində fəxri kürsüyə qalxan Əliyev abf.az saytına açıqlamasında yarışla bağlı təəssüratlarını bölüşüb. O, yeni çəkidə qüvvəsini sınamasına baxmayaraq, özünə güvəndiyini söyləyib. Boksçu yarımfinaldakı məğlubiyyətin səbəbini də açıqlayıb: “Bunun da nəticəsini gördüm. Böyüklər arasında qatıldığım ilk dünya çempionatında bürünc medala sahib oldum. Mükafatımın əyarı qızıl da ola bilərdi. Kiçik səhvlər nəticəsində belə alındı. Amma bundan sonrakı yarışlarda daha yaxşı olacağına inanıram. Yarımfinaldakı məğlubiyyətimə gəlincə, hər şey mən istəyən kimi gedirdi. Düzgün taktika da seçmişdim. Amma bir az yoruldum, dözümlük çatmadı. O da məşqlərlə aradan qaldırılası bir şeydir. Yeni çəki mənim üçün uğurlu oldu və bunu da aradan qaldırıb, inşallah, bir nömrəyə çevriləcəyəm”.

Sərxan qardaşı Tayfur Əliyevlə (60 kq) eyni gündə döyüşmələrinin həyəcanlı olduğunu da vurğulayıb: “Qardaşımın döyüşü olanda öz çıxışımdan daha çox həyəcanlanıram. Bu da bir tərəfdən yaxşıdırsa, digər tərəfdən pisdir. Həyəcan çox olur. Tayfur məğlub olduqdan 3-4 döyüş sonra rinqə mən çıxacaqdım. Həmin anda çox hisslər keçirdim. Özlüyümdə dedim ki, bu əziyyətimizi yerdə qoymayacam. Heç olmasa mən nailiyyət qazanım və bunu da bacardım”.

Tayfur və Sərxan Əliyev qardaşlarının məşqçisi Firuz Novruzov isə yetirmələrinin uğuruna inam ifadə edib. O bildirib ki, çalışdırıcısı olduğu boksçular böyük uğur vəd edir: “Boksçularımıza təşəkkür edirəm ki, başımızı uca etdilər. Tayfur Əliyevin dünya çempionu olması üçün daha yaxşı şansları vardı. Qardaşı Sərxan da buna yaxın idi. Tayfur 1/8 final döyüşünün ikinci və üçüncü raundunda taktikasını bir az dəyişməli idi. Hücumda işləməli idi. Sərxan isə bir az yoruldu. Yarımfinalın ikinci raundunda ukraynalı da bu səbəbdən onu üstələyə bildi. Amma Sərxanın bürünc medal qazanması Azərbaycan boksu üçün böyük bir uğurdur. Çünki finalda döyüşən Rusiya təmsilçisini belə asan keçə bilərdi. Artıq Sərxan dünya reytinqində də mövqeyini yüksəltdi. Təbii ki, Azərbaycanda da öz çəkisində bir nömrəyə çevirildi”.

Qeyd edək ki, Belqraddakı dünya çempionatında yığmamızın digər üzvlərindən Alfonso Dominqes (86 kq) qızıl, Məhəmməd Abdullayev (+92 kq) isə bürünc medal qazanıb.