01:37 14-11-2021
news_image
5145
FUTBOL

İki yığma Qətərə gedir, Türkiyənin ümidi son tura qaldı

Gələn il Qətərdə keçiriləcək dünya çempionatının final mərhələsində oynayacaq daha iki komanda bəlli olub.

Apasport.az saytının məlumatına görə, DÇ-2022-nin Avropa zonası üzrə seçmə mərhələsinin IX turu Fransa və Belçika mundiala vəsiqə qazanması ilə nəticələnib.

Son dünya çempionu D qrupunda 1-ci yeri təmin edib. Qazaxıstanı qəbul edən Fransa 8:0 hesabı ilə qalib gələrək xal hesabını 15-ə çatdırıb. Bununla da Didye Deşamın yetirmələri izləyiciləri üçün əlçatmaz olub. Bu qrupdan pley-offa yüksəlməyə Bosniya və Herseqovinanı 3:1 hesabı ilə məğlub edərək aktivini 11 xala çatdıran Finlandiya və 2 xal geri qalan Ukrayna iddia edir.

Belçika E qrupunun qalibi olub. Evdə Estoniyanı 3:1 hesabı ilə məğlub edən Roberto Martinesin yetirmələri 19 xalla rəqibləri üçün əlçatmaz olub. Belarus üzərində qələbə ilə (4:0) xal hesabını 14-ə çatdıran Uels və üç xal geridə qalan Çexiya pley-offa yüksəlmək üçün son turda da mübarizə aparacaq.

Qardaş Türkiyə yığmasının yer aldığı G qrupunda da birbaşa vəsiqənin taleyi son tura qalıb. Səfərdə Monteneqronun qonağı olan Niderland iki top üstünlüyünü əldən verib – 2:2. Lui van Qalın yetirmələri bununla da xal hesabını 20-yə çatdırıb. 1-ci pillədə qərarlaşan narıncıların izləyiciləri Norveçlə Türkiyə 18 xala malikdir. Son tur həm birbaşa vəsiqə, həm pley-offa yüksələcək komandanın adına aydınlıq gətirəcək. Niderlandla Norveçin qarşılaşacağı turda Türkiyə Monteneqro ilə üz-üzə gələcək. Hər üç komanda həm 1-ci yer şansına malikdir, həm də kənarda qalmaq təhlükəsi var.

Qeyd edək ki, bununla da gələn il noyabrın 21-dən dekabrın 18-dək keçiriləcək mundialda iştirakı dəqiqləşən komandaların sayı 6-ya çatıb. Meydan sahibi Qətərin birbaşa vəsiqə qazandığı mundialda oynamaq hüququnu daha öncə Avropadan Danimarka ilə Almaniya, Cənubi Amerikadan Braziliya yığmaları qazanıb.