16:51 27-03-2013
news_image

Boksçularımızdan uğurlu start

Ukraynanın Xerson şəhərində Mikola Manqerin xatirəsinə həsr olunmuş boks üzrə beynəlxalq turnirə start verilib. Boks Federasiyasından apasport.az saytına verilən məlumata görə, yarışda Ukrayna, Azərbaycan, Gürcüstan, Türkiyə, Misir, Qazaxıstan, Qırğızıstan, Özbəkistan, Moldova, Rusiya, Ermənistan komandaları iştirak edirlər.

Turnirin ilk günündə rinqə çıxan boksçularımızın hamısı qələbə qazanıblar. 56 kq çəki dərəcəsində mübarizə aparan Cavid Çələbiyev ilk döyüşünü qalibiyyətlə başa vurub. Son Azərbaycan çempionatının bürünc mükafatçısı ukraynalı Anton Kosseni 10:7 hesabı ilə məğlub edib. Tamerlan Abdullayev də (69 kq) yarışa qələbə ilə başlayıb. Azərbaycan çempionu moldovalı Valeri Sirbu ilə döyüşdə çətinlik çəkməyib – 18:8.

Ötən il 21 yaşlılar arasında Avropa çempionu olmuş Elvin İsayev də (60 kq) ilk görüşdə məşqçilərimizin etimadını doğruldub. Milli komandamızın üzvü Rusiya idmançısı Sergey Krasnitskini 13:8 hesabı ilə üstələyib. London Olimpiadasının iştirakçısı Soltan Migitinov (75 kq) da komanda yoldaşlarından geri qalmayıb. O, Ukrayna boksçusu Vladislav Voytalyuku yarışdan kənarlaşdırıb – 16:11.

Qeyd edək ki, turnirdə Salman Əlizadə, Teymur Məmmədov və Kamran Mehdiyev də iştirak edir. Yarışa martın 30-da yekun vurulacaq.