16:05 29-04-2014
news_image
389
DİGƏR NÖVLƏR

Gənc velosipedçilərimiz Xorvatiyada yarışıb

Xorvatiyada velosiped idmanının şosse növü üzrə gənclər arasında ənənəvi “Tour of İstria” yarışı keçirilib. Velosiped İdmanı Federasiyasının mətbuat xidmətindən apasport.az saytına verilən xəbərə görə, 3 gün davam edən yarışda Azərbaycanı yeniyetmə və gənclərdən ibarət yığma komandaların baş məşqçisi Əbülfəz Məmmədovun rəhbərliyi altında 5 idmançı təmsil edib.

Yürüşün 114 km-dən ibarət ilk mərhələsində yığmamızın üzvlərindən ən yaxşı nəticəyə Elgün Əlizadə imza atıb – o məsafəni liderlər qrupunda 2 saat, 41 dəqiqə, 59 saniyəyə başa vurub və fotofinişə əsasən 16-cı olub.

İkinci mərhələdə 90 km-lik dağ yollarında mübarizə aparan velosipedçilərimizdən yenidən Elgun Əlizadə fərqlənməyi bacarıb. O, liderdən 23 saniyə geri qalmaqla 33-cü nəticə göstərib – 2 saat, 34 dəqiqə, 40 saniyə.

112 km məsafəni əhatə edən son mərhələdə Elgün Əlizadə və Kənan Qəhrəmanlı finişi liderlər qrupunda bitiriblər – 2 saat, 47 dəqiqə, 2 saniyə. Fotofinişə əsasən Elgün 25-ci, Kənan 30-cu olub.

3 mərhələnin yekununa əsasən, idmançılarımız arasında ən yüksək nəticəyə Elgün Əlizadə imza atıb – o yarışın qalibindən 36 saniyə geri qalmaqla “Tour of İstria”nı 28-ci pillədə bitirib.

Qeyd edək ki, builki yarışda 25 ölkədən 150 velosipedçi mübarizə aparıb. Gənclər arasında təşkil edilən “İstria” turu yeni istedadların üzə çıxması baxımından mütəxəssislər tərəfindən önəmli turnir kimi dəyərləndirilir.

 

https://www.youtube.com/watch?v=eWSoVMPWsOs

https://www.youtube.com/watch?v=3OUnEIimDAc

https://www.youtube.com/watch?v=x4-WM9ORy5o