08:22 23-06-2014
news_image
399
DİGƏR NÖVLƏR

Dünya Kubokunun II mərhələsində uğurlu çıxış

Fransadakı Eqvebelett gölündə keçirilən akademik avarçəkmə üzrə Dünya Kubokunun II mərhələsinə yekun vurulub. Milli Avarçəkmə Federasiyasının mətbuat xidmətindən apasport.az saytına verilən məlumata görə, nüfuzlu reqatada Azərbaycanı 5 avarçəkən təmsil edib.

Onlardan Aleksandr Aleksandrov - Boris Yotov dueti yarışı medalla başa vurub. 2 nəfərlik qoşa avarlı qayıqla 2000 metr məsafəyə seçmə yürüşdə onlar finişə 6 dəqiqə 15,970 saniyəyə çataraq, 1-ci olublar. Bu nəticə ilə təmsilçilərimiz birbaşa yarımfinala yüksəlib. Növbəti mərhələdə onlar eyni məsafəni daha tez - 6 dəqiqə 14,000 saniyəyə qət etsələr də, 2-ci olublar. Bununla belə, ilk "3-lüy"ə düşdüyündən, Aleksandrov - Yotov dueti finala adlayıb. Həlledici mərhələdə isə cütlüyümüz ümumi məsafənin 1500 metrlik bölümünü hamıdan öndə keçsə də, son 500 metrlik bölümdə mövqeyini əldən verib və 6 dəqiqə 13,640 saniyə nəticə ilə ikinci yeri tutub. Birinci yer finişə 6 dəqiqə 12,700 saniyəyə çatan Martin Sinkoviç - Valent Sinkoviç (Xorvatiya) duetinə qismət olub. Üçüncü yeri isə Ceyms Makrae - Aleksandr Belonoqov (Avstraliya) dueti tutub.

1 nəfərlik yüngül çəkili qayıqla mübarizə aparan Cavid Əfəndiyevin də çıxışı uğurlu alınıb. O, seçmə yürüşdə 7 dəqiqə 11,210 saniyə nəticə ilə 4-cü yeri tutub. Amma təsəlli yürüşündə avarçəkənimiz finişə 7 dəqiqə 29,740 saniyəyə çataraq, 2-ci olub və yarımfinala yüksəlib. Növbəti mərhələdə Əfəndiyev 7 dəqiqə 8,150 saniyə nəticə ilə 5-ci olaraq, əsas finaldan kənar qalıb. B finalında isə 7 dəqiqə 8,230 saniyə nəticə ilə 2-ci, ümumi sıralamada isə 8-ci olub. Bununla da Əfəndiyev sonuncu yeri tutduğu Avropa çempionatı ilə müqayisədə xeyli yüksək nəticə əldə edib.

Nəhayət, 2 nəfərlik sükansız qayıqla 2000 metr məsafəyə yürüşdə ölkəmizi İqor Luçiç - Luka Corceviç dueti təmsil edib. Onlar seçmə yürüşdə 6 dəqiqə 45,950 saniyə nəticə ilə 5-ci yeri tutublar. Təsəlli yürüşündə finişə 7 dəqiqə 0,360 saniyəyə çatan cütlüyümüz 2-ci yeri tutaraq, yarımfinala vəsiqə qazana bilib. Amma növbəti mərhələdə onlar 7 dəqiqə 3,720 saniyə göstəriciyə ilə 5-ci olublar və əsas finaldan kənarda qalıblar. B finalında isə cütlüyümüz 6 dəqiqə 49,690 saniyə nəticə ilə 5-ci, ümumi sıralamada 11-ci yerlə kifayətlənib.

Qeyd edək ki, cəmi 18 yaşa malik Boris Yotov və 24 yaşlı Aleksandr Aleksandrovdan ibarət dueti 30 may - 1 iyunda Serbiyanın paytaxtı Belqradda keçirilmiş Avropa çempionatında da son anda liderliyi əldən verərək, gümüş medal qazanıb.