"Güclü rəqibə qarşı oynadıq. Bu səviyyədə rəqiblə qarşılaşmışdıq. Fərdi keyfiyyətləri yüksək olan futbolçulara qarşı oynayırdıq. Uşaqlardan heç bir narazılığımız yoxdur. Əllərindən gələni etdilər. Təəssüf ki, böyükhesablı məğlubiyyətə uğradıq".
Apasport.az xəbər verir ki, bu sözləri 21 yaşadək futbolçulardan ibarət Azərbaycan milli komandasının baş məşqçisi Samir Əliyev deyib. O, Avro-2025-in seçmə mərhələsi çərçivəsində keçirilən İngiltərə ilə matçı (1:5) dəyərləndirib:
- Komandanın oyunundan razısız?
- Daha inamlı, aqressiv oynaya bilərdik. Amma görünən odur ki, bu səviyyədə rəqiblə oynamaq bizim üçün hələ tezdir.
- Komandanın perspektivi nə vəd edir?
- Yaxşı uşaqlar var. İnanırıq ki, 3-4 nəfər əsas milliyə gedəcək. Oynadıqca yaxşı futbolçu ola bilərlər.
- İlk hissədə əks-hücumlarda komanda inamlı görünmürdü. Bunu nə ilə əlaqələndirirsiz?
- Təcrübə çatmır. Futbolçular Premyer Liqada oynamır. Hücumda Ağadadaş Salyanski oynayırdı. Cinahlarda isə Nəriman Axundzadə ilə Camal Cəfərov. Camal nə əvəzedici komandada oynayır, nə də Premyer Liqada. Ümidimiz Nərimana idi ki, nəsə edər. O da hələ bu səviyyədə tam bilməyib. Üzərində çox işləməlidir. İlk hissədə gücümüz, enerjimiz var idi. Nəyimiz varsa, qoyduq. Qol vəziyyətləri də yaratdıq. Problemlərdən danışmaq istəmirəm.
- Oynamayan futbolçuları niyə dəvət etmisiz?
- Ən yaxşıları dəvət etmişik. Oynamayanlar əvəzedici heyətdə oynayanlardan yaxşıdır. 5 futbolçu sayın ki, Premyer Liqada oynayır. Bu səviyyədə rəqibə qarşı başa-baş oynamaq çətindir.
- Rüstəm Samiqullin "Sabah"da Yusif İmanovun əvəzedicisidir. Ona şans verməyinizin səbəbi nə idi?
- Kim deyir ki, əvəzedicidir? Klubda onlar qərar verir. U-21-də Rüstəmə də, Yusifə də şans vermişik. Yusifin psixoloji problemləri var. Ona görə Rüstəmə üstünlük verdik. Problem tək qapıda deyil. Daha qlobal problemlər var. Çox dərinə getmək istəmirəm.
- Rza Cəfərovu dəvət etməyi düşündünüz?
- Xeyr. "Neftçi"də yeni oynamağa başlayıb. Əsas milliyə getsin, orada inkişaf etsin.
- Premyer Liqada 21 yaşlı futbolçuların oynaması limiti ləğv olunandan sonra U-21 millisində problemlər yaranıb?
- O da çıxış yolu deyil. Daha dərindən təhlil olunmalı və məsələnin həlli istiqamətində addımlar atılmalıdır. Bundan əvvəl limit var idi, amma nəticə yox idi. Futbolçular da öz üzərlərində işləməlidir. Klublar da bu istiqamətdə iş görməlidir.
- Nəriman Axundzadənin meydanda can yandırması sizi qane etdi? Sanki Camal Daha həvəsli görünürdü...
- Düz qeyd etdiniz. Nərimandan daha çox şey gözləyirdik. Amma bu, futboldur. Rəqib də bizim oyunları təhlil edib. Narazılığım yoxdur. Uşaq səhvlərindən qollar buraxdıq.
- Bir neçə gün sonra Ukrayna ilə oyun var. Rəqib haqda fikirləriniz necədir?
- Onlara qarşı bir oyun oynamışıq. Ukrayna tam fərqli komandadır. Kollektiv futbol oynayırlar. Qısa vaxt ərzində bu oyunu unudub tez bərpa olmalıyıq. Hələ 3 günümüz var. Belə oyunlar bizə lazımdır. Hər kəs görsün ki, vəziyyət nə yerdədir. İngiltərə son Avropa çempionudur. Amma oynamaq lazımdır. Təcrübəni belə matçlarda toplayırsan.
Oxşar xəbərlər
Ana səhifə
Bütün xəbərlər
Hesabım