Danildo Assioli: "Portuqaliyada hamı Azərbaycan klublarından danışır"

20.01.2025 - 21:06

Azərbaycanda uzun müddət çıxış etmiş, hazırda isə Portuqaliyada “Santa-Klara” klubunda çalışan Danildo Assioli apasport.az saytına müsahibə verib.

- Sizin də yaxından tanıdığınız Juninyo “Flamenqo”ya keçdi. Onun “Qarabağ”dan Braziliya nəhənginə transferi sizin üçün gözlənilməz oldu?
- Juninyo əla oyunçudur. Yaxşı oyunçular həmişə izlənilir. “Flamenqo” heç bir təqdimata ehtiyacı olmayan bir komandadır və Juninyo komandanın inkişafına kömək edəcək biri olacaq. Azərbaycan futbolunu başqa bazarların da izlədiyini və yaxşı işlərin görüldüyünü vurğulamaq lazımdır. Bu da çox yaxşı haldır.

- "Sevilya" da Juninyonu heyətinə qatmaq istəyirdi. Lakin o, “Flamenqo”ya keçməyə qərar verdi. Sizcə, o, düzgün addım atdı?
- Bunu düzgün edib-etmədiyini söyləmək çətindir. Onlar müxtəlif kontekstlərdə böyük klublardır. Gələcək hər şeyi göstərəcək.

- “Flamenqo"nun baş məşqçisi Felipe Luis Juninyo ilə danışdıqdan sonra onun bu kluba keçməyə qərar verdiyi deyilir. Sizcə, Juninyo Braziliya millisinə yüksələ bilər?
- Futbolun gözəlliyi onun gözlənilməzliyindədir. Mən öz təcrübəmdən inanıram ki, futbolda hər şey mümkündür. Juninyonun istedadı var və o, böyük klubu təmsil edir. Mütləq izləniləcək. Hər şey mümkündür.

- “Qarabağ”a gələn futbolçular indi ən azı bir ildən sonra daha güclü liqalara və klublara keçə bilər. Kadi Borges (“Krasnodar”), İbrahima Vadjini (“Sent-Etyen”) misal çəkmək olar. İndi “Qarabağ”ı əcnəbi futbolçular üçün əsl tramplin hesab etmək olarmı?
- Şübhəsiz ki, belədir. Avrokuboklar çərçivəsində “Qarabağ” azarkeşləri üvə Azərbaycan futbolu üçün qapılar açıb. Qurban Qurbanov və onun məşqçilər korpusu tərəfindən əla işlər görülür. Bunu demək lazımdır.

Məsələn, hazırda Portuqaliyada çıxış edən futbolçular “Qarabağ”a keçməkdə maraqlıdırlarmı? “Qarabağ”ı Portuqaliyada futbolçular və klublar daha yaxşı tanıyır?
- Tək “Qarabağ” yox, Azərbaycan çempionatını bura əlavə etmək olar. Burda, Portuqaliyada hamı Azərbaycan klublarından danışır, yarış və klublarla tanışdır. Burdakı futbolçulara Azərbaycan klublarından təklif gələndə, bir neçə il əvvəl mənim olduğum kimi həyəcanlanırlar. Mən də Azərbaycanda 5 ilə yaxın oynamışam. Hər şey də yaxşı alınırdı. Portuqaliyada oynayanlar da Azərbaycandan gələn təklifi dəyərləndirirlər.