“Qarabağ”ın sabiq futbolçusu Elvin Məmmədov apasport.az saytına müsahibə verib.

- “Qarabağ” bu gün FKSB ilə qarşılaşacaq. Azərbaycan çempionunun bu oyunda şanslarını necə dəyərləndirirsiniz?
- Hər şeydən əvvəl "Qarabağ"a uğurlar arzulayıram. Allah qoysa, onlar qələbə ilə Azərbaycan xalqını, futbolsevərləri sevindirərlər. Təbii ki, asan matç deyil. Avrokuboklarda asan oyun olmur. FKSB də yaxşı komandadır. Fikrimcə, bu görüşdə şanslar 50/50-dir. Ümid edək ki, sonda sevinən tərəf "Qarabağ" olacaq. Təmsilçimizə uğurlar arzulayıram.

- “Qarabağ” Juninyonu “Flamenqo”ya satdı və hazırda hücum xəttində Musa Qurbanlı ilə Nəriman Axundzadə qalıb. Juninyosuz çətin olacaq? 
- Juninyonun gedişi avrokuboklarda "Qarabağ" üçün çətinlik yaradacaq. Amma Azərbaycan çempionatında hansısa çətinlik olacağını düşünmürəm. Avrokuboklara gəlsək, komandada hazırda hücumçular var. Musa Qurbanlı, yoxsa Nəriman Axundzadənin oynaması baş məşqçinin verəcəyi qərardır. Bu haqda nəsə deyə bilmərəm. 

- Juninyonun gedişindən savayı, Yassin Benzia anası vəfat etdiyi üçün komandaya hazırlıq dönəmində qoşula bilmədi. “Qarabağ”ın heyətində problem olduğu görünür. Bütün bunların fonunda kollektivdə inamsızlıq yaranacağını düşünürsən?
- “Qarabağ” böyük komandadır. Düzdür, adlarını çəkdikləriniz komanda üçün böyük fiqurlardır. Amma "Qarabağ" evdə oynayacaq. Bilirlər ki, bu matç "Qarabağ" üçün bəlkə də son şansdır. İnanıram ki, bunların təsirləri olmayacaq. Komandada başqa oyunçular da var. 

- “Qarabağ” pley-off şansını davam etdirmək üçün son iki görüşdə qalib gəlməlidir. Sizcə, "Qarabağ" hazırkı heyəti ilə bunu edəcək gücdədir?
- "Qarabağ"ın heyəti daim yaxşı olub. İnanıram ki, təmsilçimiz bu gün qələbə qazanacaq. Doğrudur, FKSB asan rəqib deyil. Amma “Qarabağ”ın qələbəsinə inanıram. Son turdakı "Olimpiakos"la görüşə isə hələ zaman var. Bəlkə ona qədər Yassin Benzia qayıdar, daha yaxşı formaya düşər. Ona görə FKSB ilə görüşdə inanıram ki, ağdamlılar üç xalı götürəcək.

- "Qarabağ"dan gedərkən yeri doldurulmayacaq düşünülən çox futbolçu olub. Bəs, klubun yeni Juninyonu tapacağına əminsiz?
- "Qarabağ"da bundan qabaq da yaxşı futbolçular olub. Amma yeri doldurulub. Mənim üçün Juninyo çox yaxşı futbolçu idi. Həm sürətinə, həm qol epizodlarına girməyinə, həm də dəyərləndirməyinə görə. "Qarabağ"da seleksiya daha yaxşıdır. İnanıram ki, tez bir zamanda Juninyodan da yaxşı futbolçu taparlar.
 

• "Qarabağ"ın oyunu ilə əlaqədar metronun iş vaxtı 1 saat uzadılacaq
• Milli Olimpiya Komitəsi BOK-a rəsmi müraciət edib
• “Kəpəz”in futbolçusu: "Heç kim bu nəticəni gözləmirdi"
• Azərbaycan klubunun üzvü 5 oyunluq diskvalifikasiya olunub
• Tərlan Əhmədov: "Bəzi oyunçular artıq “Qarabağ”da oynamaqdan doyublar”