Həndbolçu qadınlardan ibarət Azərbaycan yığması bu gün dünya çempionatının seçmə mərhələsində mübarizəyə başlayır. Apasport.az saytının hesablamalarına görə, bu, 1997-ci ildən analoji yarışda debüt edən millimizin 6-cı cəhdi olacaq.

Komandamız bundan öncə seçmə mərhələdə 5 dəfə qüvvəsini sınayıb ki, bu dövrdə də həndbolçularımız 26 oyunda (pley-off mərhələsi də nəzərə alınmaqla) nəyə qadir olduqlarını nümayiş etdiriblər. Bu görüşlərin 9-da qələbə qazanmağı bacaran ölkəmizin bir nömrəli komandası yalnız DÇ-2005-də qrup səddini aşıb. Lakin burada Avstriya ilə üz-üzə gələn həmyerlilərimiz final mərhələsinə vəsiqə qazana bilməyiblər.

İndiyədək seçmə mərhələlərdə yığmamız ən çox xalı DÇ-2009-da toplayıb: ümumilikdə 19 xal yığan həndbolçularımız bunun 8-ini son yarışda qazanıblar.

Topların fərqinə gəldikdə, milli komandamızın burada da vəziyyəti ürəkaçan deyil. 26 oyunda 762 top buraxan təmsilçilərimiz bunlardan 642-sinin əvəzini çıxmağı bacarıblar.

Xatırladaq ki, dekabrın 3-5-də keçiriləcək DÇ-2011-in seçmə mərhələsində II qrupda yer alan yığmamız İsveçrə, Makedoniya və Yunanıstanla qüvvəsini sınayacaq.

Həndbolçularımızın dünya çempionatının seçmə mərhələsində oyunları

DÇ	O	Q	H	M	T	X	Qrupda yeri (komandaların sayı)
1997	4	0	0	4	77-110	0	3 (3)
2003	6	1	0	5	148-203	2	4 (4)
2005	5	3	1	1	132-109	7	2 (6)
2007	4	1	0	3	101-128	2	4 (5)
2009	5	4	0	1	137-142	8	2 (6)
CƏMİ	24	9	1	14	595-692	19

Qeyd: Həndbolçularımız 2005-ci ildə pley-off mərhələsində oynayıb və 2 oyunun nəticəsinə görə 47:70 (28:32, 19:38) hesabı ilə uduzub.

Tahir HÜMMƏTOV

• "Misli"dən voleybola böyük dəstək – AVF ilə müqavilə imzalandı
• “Azerreyl” klubunun üzvləri Fransaya yollanıblar
• "Gəncə"də ayrılıq
• "Azərreyl" heyətini Kolumbiya millisinin üzvü ilə gücləndirib
• Azərbaycan klubundan 6 transfer