Futbol üzrə Ukrayna və ABŞ milli komandalarının görüşü baş tutmayacaq. Apasport.az saytının məlumatına görə, bu barədə Ukrayna Futbol Federasiyasının prezidenti Anatoli Konkov açıqlama verib.

FİFA-nın təqviminə əsasən, Ukrayna və ABŞ milliləri sabah Xarkov şəhərində yoldaşlıq matçı çərçivəsində üz-üzə gəlməliydilər. Lakin Ukraynada yaşanan olaylar səbəbi ilə görüşün Kiprdə keçirilməsinə qərar verilmişdi.

İCTV-də yayımlanan "Svoboda slova" proqramında qonaq olan Konkov isə bildirib ki, qarşılaşma baş tutmayacaq: “Ölkədə bu cür gərgin vəziyyət olduğu halda, hansı futboldan söhbət gedə bilər? Komanda Kiprə uçmayacaq və ABŞ-la görüş baş tutmayacaq. Bu federasiyanın, məşqçilər korpusunun və futbolçuların qərarıdır. Biz öz ölkəmizdə, öz evimizdə oynamaq istəyirik”.

Bu arada, ABŞ Futbol Federasiyasının “twitter” hesabında matçın keçiriləcəyinə dair açıqlama yerləşdirilib: “Ukrayna Futbol Federasiyası milli komandalarının təqvimə uyğun olaraq, yoldaşlıq oyunu keçirtmək üçün Kiprə yollanacaqlarını təsdiqləyiblər”.

Qeyd edək ki, sabah Kiprdə keçirilməli olan Ukrayna – ABŞ matçı Bakı vaxtı ilə saat 23:00-a təyin olunub.