İsveçrə milli komandasının sabiq futbolçusu Murat Yakın 1996-cı ildə Bakıda keçirilən oyunu unuda bilmir. Apasport.az saytının məlumatına görə, hazırda “Tyun” klubunun baş məşqçisi olan türk əsilli çalışdırıcı İsveçrə çempionatının digər iştirakçısı “Lütsern”dən olan həmkarı Rolf Fringerlə hər görüşəndə də DÇ-1998-in 15 il əvvəlki qarşılaşmasından danışır.

Həmin vaxt avqustun 31-də Azərbaycan milli komandasının qonağı olan isveçrəlilər 0:1 hesabı ilə uduzmuşdu. İndiyədək həmin məğlubiyyəti futbol tarixinin qara ləkəsi sayan mərkəzi avropalıları həmin görüşə baş məşqçi kimi məhz Fringer çıxarmışdı. Yakın isə həmin matçda penaltini qaçırmaqla antiqəhrəman olmuşdu. Bu iki isveçrəlinin növbəti görüşündə də müzakirə mövzusu penaltilər olub.

Komandasında 3 oyunçunu ştat üzrə 11 metrlik vurmağa hazırladığını deyən Murat özünün 15 il əvvəl yaşadığı uğursuzluğu da yada salıb: “Bakıdakı matçda 11 metrlik cərimə zərbəsi təyin olunan kimi bütün oyunçularımız topdan uzaqlaşdı. Onların heç biri zərbə vurmağa ürək etmirdi. Komanda yoldaşlarımın məsuliyyətdən çəkindiyini görüb topa özüm yaxınlaşdım. Hər şeyi də düz etmişdim. Topu qapının sol küncünə göndərdim. Azərbaycan yığmasının qapıçısı isə əks küncdə aciz vəziyyətdə uzanmışdı. Onu aldadıb sağa tullanmağa məcbur etmişdim. Lakin təəssüf ki, top sol dirəkdən yan keçdi. Amma bir şeylə fəxr edə bilərəm ki, qapıçının üstünə vurmamışdım. Ümumiyyətlə karyeram boyu heç vaxt penalti zamanı qapıçını nişan almamışam. Hər halda qapıdan yan vurmaq qolkiperin üstünə vurmaqdan yaxşıdır”.

• “Nyukasl”da yeni müqavilə
• “Barselona” 2 futbolçunun qeydiyyatını tamamlayıb
• “Arsenal” Avropa çempionunu istəyir
• “Fənər” “Göztəpə”nin futbolçusu ilə maraqlanır
• “Arsenal”da ciddi itki - Mövsümü erkən başa vurdu