"Qarabağ"ın veteran futbolçusu Zaur Həşimov apasport.az saytına müsahibə verib.
- "Qarabağ" "Malmö" ilə bacarmadı və rəqibinə uduzdu. Sənin üçün gözlənilməz nəticə idi?
- Bəli, "Qarabağ"ın məğlubiyyəti mənim üçün gözlənilməz oldu. Çünki " Qarabağ"ın bu görüşdən ən azından bir xalla ayrılacağını düşünürdüm. Çox təəssüflər olsun ki, uduzduq. Halbuki daha yaxşı nəticə də qazana bilərdik.
- "Qarabağ"ın son 4 avrokubok matçındakı uğursuz nəticəsini nə ilə əlaqələndirirsən? "Dinamo"ya iki oyunda, "Tottenhem"ə və bu dəfə də "Malmö"yə məğlubiyyət. Sanki nəsə getmir, yoxsa sadəcə şanssızlıqlar?
- "Dinamo" ilə hər iki oyunda nəticəyə baxmayaraq, "Qarabağ" yaxşı oynadı. "Tottenhem"lə görüşü də statusuna görə " Qarabağ"ı qınamaq olmaz. Evdə "Malmö" ilə oyun üç xal üçün yaxşı şans idi. Əfsuslar olsun ki, bu şansı əldən verdik.
- "Qarabağ"ın "Malmö" qarşısında bu qədər əziyyət çəkməsi, epizodlara az girməsi, girdikləri epizodlardan yararlana bilməmələri nə ilə bağlıdır?
- Oyundan öncə də o fikirdəydim ki, "Malmö" hörmətə layiq, öz dəst-xətti olan komandadır. Onlar "Qarabağ"ı detallı şəkildə analiz etmişdilər. Oyun ərzində demək olar ki, səhvsiz oynadılar. Bunun da nəticəsində üç xalı öz aktivlərinə yazdılar.
- Səncə, "Qarabağ" rəqiblər arasında daha uyğun "Malmö"yə qalib gələ bilmədisə, digər rəqiblərlə görüşdə nəyə ümid edə bilərik?
- "Qarabağ" təcrübəli komandadır. Onu əvvəlcədən hesabdan silmək olmaz. Gələcək matçlarda "Qarabağ"ın qələbə qazanacağına inanıram. Çünki onların buna gücü çatar.
- "Qarabağ"ın özünə gəlməsi üçün nə etmək lazımdır səncə? "Qarabağ"ın geridönüşü səncə gec çəkməyəcək?
- Futbolda zaman-zaman komandanın işlərinin planla getməməsinin şahidi oluruq. Bu gün hər hansı bir faciə yaşanmayıb. "Qarabağ"a Avroliqada qələbə lazımdı ki, işlər qaydasına düşsün. Bu, çox inandırıcıdır.
- "Qarabağ"ın qapıçıları nə Mateuş Koxalski, nə də Fabyan Buntiç inamlı təsir bağışlayır. Səncə, "Qarabağ"da yenidən qapıçı problemi hökm sürür?
- Hər ikisi Avropa məktəbi keçmiş qapıçılardır. Oynadıqları liqalar da, Avropanın orta səviyyəli çempionları olub. Bəlkə də, onlar "Qarabağ"ın statusunun təzyiqini hələ qaldıra bilmirlər. Bir müddət sonra tam özlərini sübut edəcəklər.
Oxşar xəbərlər
Ana səhifə
Bütün xəbərlər
Hesabım