Bakı. Elşən Məmmədov-APA-Sport. 2016-cı ildə keçiriləcək Yay Olimpiya və Paralimpiya Oyunlarına namizədliyini irəli sürən şəhərlərin nümayəndələri Beynəlxalq Olimpiya Komitəsinin (İOC) İcraiyyə Komitəsinin iclasına dəvət olunublar. “APA-Sport” agentliyinin məlumatına görə, iyunun 4-də Yunanıstanın paytaxtı Afinada öz işinə başlayacaq toplantıya “Bakı-2016”nın Təşkilat Komitəsinin rəsmiləri də qatılacaqlar. İki günlük iclasda Təşkilat Komitəsinin sədri, baş nazirin I müavini Yaqub Eyyubov, gənclər və idman naziri Azad Rəhimov və Milli Olimpiya Komitəsinin vitse-prezidenti Çingiz Hüseynzadə iştirak edəcəklər. Azərbaycan nümayəndə heyəti 3-7 iyun aralığında Afinada olacaq. Toplantıda 2016-cı il olimpiadası uğrunda mübarizədə ikinci mərhələyə vəsiqə qazanacaq şəhərlərin adları açıqlanacaq. İddiaçı şəhərlərin nümayəndələri iclası müşahidəçi qismində izləyəcəklər.
Qeyd edək ki, 2016-cı il Olimpiadasına Bakı ilə yanaşı, Praqa (Çexiya), Madrid (İspaniya), Doha (Qətər), Tokio (Yaponiya), Çikaqo (ABŞ) və Rio-de-Janeyro (Braziliya) şəhərləri namizəddir. Qalib şəhərin adı ikinci mərhələyə vəsiqə qazananlar arasından seçilərək, 2009-cu il oktyabrın 2-də Danimarkanın paytaxtı Kopenhagendə keçiriləcək İOC-un sessiyasında elan olunacaq.

• Azərbaycan kamandan oxatanları Avropa çempionatında mübarizə aparacaqlar
• Azərbaycan atıcısı Avropa Kubokunda qızıl medal qazanıb
• AMADA antidopinq üzrə sertifikatlı mütəxəssislərin hazırlanmasına başlayıb
• Qubada "Dağçılıq və Təbiət Turniri - Qrız 2026" təşkil edilib - FOTO
• Azərbaycan Üzgüçülük Federasiyası rekordçu Cəmil Əliyevə sertifikat təqdim edib