Futbol üzrə Azərbaycan çempionatının I Liqasının “Baku Sporting” - “Qəbələ” matçından (0:5) sonra qonaqların futbolçusu Şahin Şahniyarov jurnalistlərə müsahibə verib.
- Sona 7 tur qalmış Premyer Liqaya vəsiqəni təmin etdiz. Uğuru belə erkən gözləyirdiz?
- Çətin olacağını bilirdik. I Liqadakı infrastruktur və meydançaların əlverişsiz olması buna səbəb idi. İlk turda “Zaqatala” ilə heç-heçə etdik. Bəzi insanlar düşünürdü ki, asan olacaq. Amma ilk matçdan sonra çətin olacağını gördük. Həmin bərabərlik bizim üçün daha yaxşı oldu.
- Meydançaların durumundan danışdın. Ən çətinlik çəkdiyiniz stadion hansı oldu?
- “Karvan” və “İmişli”nin meydançaları təbii örtüklüdür. Amma Premyer Liqa səviyyəsində deyil. Normal ötürmələr vermək olmur. Ən çox Yevlax şəhər stadionunda çətinlik çəkdik. Digər meydançaların demək olar ki, hamısı süni örtüklüdür və eyni səviyyədədir.
- Mövsümün əvvəlində “Baku Sporting” də səninlə maraqlanırdı. Səni “Qəbələ”də saxlayan nə oldu?
- Həmin ərəfədə həm klubla 3 illik müqaviləm var idi, həm də komandanı çətin vəziyyətdə atıb getmək düzgün olmazdı. Mən bu akademiyanın yetirməsiyəm.
- Yığmada debüt etdin. Həmin matçla bağlı hislərini bölüşərdin...
- Milli komandanın heyəti açıqlananda xəbərim yox idi. Mənə sonradan dedilər. Çox sevindim və həyəcanlandım. O, məsuliyyəti üzərimdə hiss etdim və qürurlandım.
- Üzərində yığmadakı məğlubiyyətlərin psixoloji təsiri var?
- Birdən-birə I Liqadan yığma səviyyəsinə yüksəlmək çətin idi. Çünki əsas millidə diqqət çox daha böyükdür. Hər kəsin gözü üzərində olur. Yenilgilərin psixoloji təsirini yaşadım. Amma hər zaman azarkeşlərimizi sevindirmək üçün çalışırıq.
- Belarus millisi ilə oyundan sonra Fernandu Santuşla hər hansı danışığınız oldu?
- Xeyr, bu barədə danışmadıq. Məqsədim yenidən milliyə dəvət almaqdır. Çağırılmasam da, məşqçinin qərarına da hörmətlə yanaşıram.
- Premyer Liqa klublarının diqqətlərini üzərinə çəkmisən. Təklif olarsa, bu barədə düşünəcəksən?
- “Qəbələ” ilə 2 illik müqaviləm var. Yalnız burdakı durumum barədə düşünürəm. Heç bir klubla da danışığım olmayıb. Əsas hədəfim Avropada çıxış etməkdir. Təklif olarsa, dəyərləndirmək niyyətindəyəm.
- Gələn mövsümdən Premyer Liqada legioner limiti ləğv olunacaq. Bunun sənə nə dərəcə təsiri olacaq?
- Şans qazanmaq üçün əlimdən gələni edəcəm. Nə qədər legioner olur olsun, mübarizə aparmaq lazımdır. Açığı, mənim üçün futbolçunun milliyətinin fərqi yoxdur. Bura qədər mübarizə ilə gəlmişəm, davamı da elə olacaq.
- Futbolda özünə kumir gördüyün şəxs kimdir?
- Azərbaycanda Emin Mahmudov və Qara Qarayevin oyun stilini bəyənirəm. Ümumi dünya futbolunda isə kumir olaraq gördüyüm biri yoxdur. Ən bəyəndiyim futbolçu isə Lioner Messidir. Onun kimi gələcək uğur qazanmaq, Avropada çıxış etmək istəyirəm.
İsmayıl Xeyrullayev
Oxşar xəbərlər
Ana səhifə
Bütün xəbərlər