Bakı. Mehman Süleymanov - APA-Sport. İspaniya milli komandasının baş məşqçisi Luis Araqones Avropa çempionatları tarixinə düşüb. “APA-Sport” agentliyinin məlumatına görə, L.Araqones məşqçi kimi ən yaşlı qitə çempionu adını qazanıb. İspaniyalı çalışdırıcı bu uğura 70 illik yubileyinə bir ay qalmış, Avstriya və İsveçrədə keçirilən Avropa çempionatında qazanıb. Bununla da, L.Araqones 4 il öncə Yunanıstan yığmasının baş məşqçisi postunda Avropa çempionu tituluna yiyələnən almaniyalı Otto Rehagelin rekordunu təzələyib. O.Rehagel 66 yaşında qitə birinciliyinin qalibi olub. Hər halda, o, Avropa çempionu olan baş məşqçilər arasında yeganə əcnəbi kimi tarixə düşüb. Yunanıstan istisna olmaqla, digər milli komandalara qızıl medalları yerli mütəxəssislər qazandırıblar. Qitə çempionları arasında milli komandamızın almaniyalı baş məşqçisi Berti Foqts da var. Onun Avropa çempionatındakı şəxsi rekordu ən azı 2012-ci ilədək qırılmayacaq. Belə ki, B.Foqts həm futbolçu, həm də baş məşqçi kimi qitə birinciliyinin qalibi olan yeganə şəxsdir. Almaniyalı futbolçu qismində 1972-ci ildə Avropa, bundan iki il sonra dünya çempionu olub. B.Foqtsun digər rekordu isə iyunun 29-da yekunlaşan Avropa çempionatında yenilənib. Yığmanın çalışdırıcısı kimi qitənin mötəbər futbol turnirində ən çox oyun (37) keçirən almaniyalının rekordunu isveçli həmkarı Lars Laqerbak qırıb. Onun baş məşqçisi olduğu İsveç milli komandası 1/4 finala çıxa bilməsə də, qrupda keçirilən üç oyun L.Laqerbekin B.Foqtsu qabaqlamasına (38) kifayət edib.

Avropa çempionu olan bütün baş məşqçilər:

1	2	3	4	5
1960	Fransa	SSRİ	Qavriil Kaçalin	17.01.1911
1964	İspaniya	İspaniya	Xose Vilyalonqa	04.12.1919
1968	İtaliya	İtaliya	Serluicco Valkaredji	12.02.1919
1972	Belçika	AFR	Helmut Şön	15.09.1915
1976	Yuqoslaviya	Çexoslovakiya	Vatslav Jejik	01.10.1923
1980	İtaliya	AFR	Yupp Dervall	10.03.1927
1984	Fransa	Fransa	Mişel İdalqo	22.03.1933
1988	AFR	Hollandiya	Rinus Mihels	09.02.1928
1992	İsveç	Danimarka	Riçard Möller-Nilsen	19.08.1937
1996	İngiltərə	Almaniya	Berti Foqts	30.12.1946
2000	Belçika və Hollandiya	Fransa	Roje Lemyer	18.06.1941
2004	Portuqaliya	Yunanıstan	Otto Rehagel	08.09.1938
2008	Avstriya və İsveçrə	İspaniya	Luis Araqones	28.07.1938

Qeyd: 1 - çempionatın keçirildiyi il, 2 - çempionatın keçirildiyi ölkə, 3 - çempionatın qalibi, 4 - çempion yığmanın baş məşqçisi, 5 - təvəllüdü

• Bakı sakinləri övladlarını niyə idmana yazdırır? - SORĞU
• Nazir keçmiş müavini ilə selfisini paylaşdı-MÜZAKİRƏLƏRƏ SƏBƏB OLDU - FOTO
• Mariana Vasileva Gənclər və idman nazirinin müavini vəzifəsindən azad edilib
• AMADA və Milli Paralimpiya Komitəsi seminar keçirib
• "Şahdağ"da keçirilən Dünya Kubokuna yekun vurulub