“Araz-Naxçıvan”ın legioneri, ölkə kubokunun yarımfinal mərhələsinin “Qarabağ”a qarşı ilk matçında yeganə qolun müəllifi olan Felipe Santos Apasport.az saytına müsahibə verib.
- Premyer Liqadakı "Araz-Naxçıvan" - "Qarabağ" görüşündən sonra budəfəki matça hansı hisslərlə çıxmışdın? Gərginlik var idi, yoxsa, çempionatdakı görüşü yaddan çıxartmışdın?
- Bilirdim ki, bu matçda bütün gözlər mənim üzərimdə olacaq. Bunun özü də əla idi. Çünki qol vurdum və hər kəsə öz keyfiyyətimi bir daha göstərdim. Hər oyuna qalib gəlmək üçün çıxıram. Rəqibin fərqi yoxdur. Həmişə də belə olacaq. Keyfiyyəti gizlətmək üçün heç bir yol yoxdur.
- Bu dəfəki görüşdə həmin gərginlik çox da olmadı. Yassin Benzia və "Qarabağ" oyunçuları ilə matçdan əvvəl danışıb, söhbət etmişdiz? Barışıq olmuşdu?
- Mən heç kimlə danışmamışdım. Diqqətimi də bu matça yönəltmişdim. Vacib matç idi. Mənim tərəfimdən problem olacağını düşünürdülərsə, səhv edirdilər. Mən sadəcə futbolumu oynadım. Şadam ki, komandama qalib gəlməsi yolunda kömək etdim.
- Matçdakı yeganə qolu sən vurdun. Həmin anları necə şərh edərdin? Xüsusilə özün vurmaq istədin?
- Komandaya hər oyunda qol vurmaq, asist etməklə köməkliyimi göstərmək istəyirəm. Bir daha töhfə verməkdən çox xoşbəxt oldum.
- İlk matçdakı 1:0 hesablı qələbə sizə finala çıxmaq üçün yetərli olacaq? İndi özünüzü daha şanslı hesab edirsən, yoxsa rəqibi?
- “Qarabağ” güclü komandadır. Burada keyfiyyət məsələsi də çoxdur. Lakin hələ heç nə həll olunmayıb. Cavab oyunu qalib gəldiyimiz ilk oyundan qat-qat vacib olacaq.
- "Qarabağ" Azərbaycanda hegemonluq edir. Onların "come back" edə biləcəyindən ehtiyat edirsən, yoxsa düşünürsən ki, cavab qarşılaşmasında vuracağınız bir qolla və ya yaxşı, düzgün müdafiə ilə rəqibi keçəcəksiz?
- “Qarabağ” uzun illərdir ki, Premyer Liqada çempionluq qazanır. Kubokda da çempionluqlar qazanırlar. Onların axırıncı dəfə kuboku uduzduqları görüşdə mən də iştirak etmişdim. “Qəbələ”nin formasında onları keçmişdik, mən də öz köməkliyimlə töhfə vermişdim komandama. Sonda da biz çempionluq yaşamışdıq. Doğrudur, indi də “Qarabağ” favoritdir. Amma ümid edirəm ki, “Qəbələ”də olduğum vaxtdakı nəticə baş verər və biz finaa vəsiqə qazanarıq. Bizim də yaxşı komandamız var və hər şeyi bacara bilərik.
- “Araz-Naxçıvan" ölkə çempionatında sonuncu dəfə 20-ci turda qələbə qazanıb. "Qarabağ" üzərindəki qələbə sizə Premyer Liqa görüşlərində də motivasiya verəcək?
- Ölkə kuboku artıq geridə qaldı, cavab görüşünə hələ vaxt var. İndi yalnız qarşıdakı çempionat matçını düşünürük. İndi bütün diqqət çempionata yönəlib. Biz qalib gəlməliyik və çempionat vasitəsilə avrokuboklara yer verən pillələrdən birini tuta bilməliyik. Əsas məqsəd budur.
- “Neftçi" evdə "Sabah"a uduzub. Finalda hansı rəqibi görmək istəyərdin?
- Bu haqda düşünmürük. Biz yalnız diqqətimizi finala yüksəltməyə yönəldəcəyik. Digər cütdən hansı rəqib gəlsə də, finala çıxası olsaq, əlimizdən gələni edəcəyik. Amma əvvəlcə öz üzərimizə düşəni etməliyik. Hazırda çempionat matçlarını oynayacağıq. Kubokun cavab görüşü gələndə, həmi görüşə fokuslanıb, final üçün oynayacağıq.
Oxşar xəbərlər
Ana səhifə
Bütün xəbərlər