Qadın futbolçulardan ibarət Azərbaycan millisinin üzvü Aysun Əliyeva apasport.az saytına müsahibə verib. 26 yaşlı futbolçu Azərbaycan millisinin Avropa çempionatının seçmə mərhələsində keçirəcəkləri oyunlar barədə danışıb. 

- UEFA Millətlər Liqasının B Liqasına qrupdan lider çıxaraq yüksəldiniz. Səncə, B Liqasında da bu cür uğurlu nəticə qazana biləcəksiniz?

- İstəyimiz B liqasında oynamaq idi və bu gün ilk matçımıza çıxacağıq. Hər zaman olduğu kimi çətin oyun olacaq, amma inanıram ki, yaxşı nəticə qazana bilərik. B liqası bizim üçün çox yaxşı təcrübə olacaq. Bu qrupda maksimum xal almaq üçün əlimizdən gələnin ən yaxşısını edəcəyik.

- Qadınlardan ibarət millinin bu uğurunu nə ilə əlaqələndirirsən?

- Bunu qızların ölkə xaricində legioner həyatı yaşaması ilə əlaqələndirmək olar. Ən əsası isə komanda olaraq birliyimiz hər oyunda özünü göstərir.

- Macarıstan və İsveçrəyə qarşı matçlardan gözləntiləriniz nələrdir?

- Hər iki rəqibin də bəlli səviyədə olduğunu bilirik. Buna baxmayaraq, 2 rəqibdən də ən az 1 xal almaq üçün mübarizə aparacağıq. 

- B Liqasının I qrupunda hədəfləriniz nədir?

- Əsas istəyimiz B liqasında qalmaqdır. Bunun üçün də hədəfimiz bu oyunlarda yaxşı nəticələr qazanmaqdır.

- Bir müddət öncə ana olmuşdun. Məzuniyyətdən sonra komandaya adaptasiya dönəmi necə keçdi? Yenidən formanıza qayıda bildinizmi?

- Hələ tam olaraq əvvəlki formama qayıda bilməsəm də, indi hər şey daha yaxşıdır. Ümid edirəm, növbəti oyunlarda artıq əsas heyətdə yerimi almağa başlayacam.

Nərmin Vüqarqızı