Misli Premyer Liqasının XXXIV turunun "Turan Tovuz" - "Neftçi" matçından (1:2) sonra qonaqların baş məşqçisi Samir Abasovun mətbuat konfransı keçirilib.
Apasport.az xəbər verir ki, təcrübəli mütəxəssis oyun haqqında düşüncələrini bildirib:
- Heç bir hədəfi olmayan komandanı oyunlara kökləmək çətin deyil?
- Əlbəttə çox çətindir. Həm də itkilərimiz ola-ola. Amma çətinliklər çox rastımıza çıxıb. İstəmirəm ki, kimdəsə bizimlə oyuna çıxanda rahatlıq oldun. "Neftçi"nin adı hər şeydən üstündür.
- Növbəti mövsümlə bağlı azarkeşlərə hansı vədlər verə bilərsiniz?
- Planlar cızırıq. "Neftçi" azarkeşlərinə söz deməyə ehtiyac yoxdur. Onlara o qədər vədlər verilib ki. Oyunumuzla hər şeyi göstərməliyik.
- Əgər mövsümün əvvəlində "Neftçi"nin baş məşqçisi təyin olunsaydız, sizcə, vəziyyət fərqli ola bilərdi?
- Bəlkə bundan da pis olardı. Keçmiş keçmişdə qaldı. Yaxşı gələcəyə doğru getməyə çalışacağıq.
- Bu gün meydana 3 hücumçu buraxmışdız. Onların oyunu haqqında nə deyə bilərsiniz?
- Məcburiyyətdən deyildi. Hündürboylu oyunçuları meydanda saxlamaq istəyirdik. Rəqibin oyun üslubu hamıya bəllidir. Hücumçularımız çox yaxşı oynadılar. Rəqibin müdafiəsinə təzyiq göstərdilər.
- Aleks sanki komandaya uyğunlaşa bilmir. Bunun səbəbi nədir?
- Biz gətirdiyimiz oyunçudan dərhal nəsə istəyirik. Aleks bizə çətin vaxtda qoşulub. Onun kimi futbolçulara səbrlə yanaşmalıyıq. Keyfiyyəti, ustalığı bəllidir. Məncə, düzələcək.
- Belə iddialar var ki, "Neftçi"də yeni mövsüm üçün seleksiya üzrə məşqçilər qrupu yaradılacaq. Bu, sizin işinizi nə dərəcədə asanlaşdıracaq?
- Çox asanlaşdıracaq. Ciddi addımlar atmalıyıq. Bunun üzərində işləyirik. Sağ olsun klub rəhbərliyi, şəraiti yaradır.
Oxşar xəbərlər
Ana səhifə
Bütün xəbərlər