Yuriy Hura: "Sabah bu nəticəni düzəltməyə çalışacağıq"

17.07.2024 - 19:39

"Şerif" Avropa Liqası I təsnifat mərhələsinin cavab görüşü çərçivəsində sabah Bakıda "Zirə"nin qonağı olacaq.

Apasport.az xəbər verir ki, Moldova təmsilçisinin baş məşqçisi Yuriy Hura matçdan öncə təşkil olunan mətbuat konfransında jurnalistlərin suallarını cavablandırıb:

- İlk oyunda heyətdə moldovalı futbolçu yox idi. Buna necə aydınlıq verə bilərsiz?

- Bizim komandada moldovalı futbolçular var. Sadəcə oyunun statusu fərqlidir. Qərara gəldik ki, əcnəbi oyunçulara şans verək.

- Bakı həm də çimərlik şəhəridir. Sabahkı oyunda futbolçularınızı dənizə aparmaq planınız yoxdur?

- Xeyr. Belə planımız yoxdur. Bizdə də istidir, Bakıda da hava çox istidir. Sadəcə nəmişlikdir.

- Qorxmursuz ki, sabah isti sizin zərərinizə olar?

- Hər iki komanda üçün isti olacaq. Tiraspolda da sərin deyildi.

- Ayyub Allaşdan Azərbaycan və ya "Zirə" haqda soruşmuşdunuz?

- Onunla danışmışdıq. Müəyyən fikirlər almışdım. Azərbaycan futbolu haqda məlumat vermişdi. "Zirə" ilə bağlı isə standart vəziyyətlərdəki davranışlarından danışdı.

- Püşkatmada rəqibin adı "Zirə" olanda, ilk oyunda evdə bu cür nəticə ilə qarşılaşacağınızı düşünürdüz? Uğurlu püşkdür?

- Deməzdim ki, "Zirə"dən qorxmuşduq. Püşk "Zirə"ni çıxardı. Biz evdə oynadıq, uduzduq. Amma sabah da oyun var. Sabah bu nəticəni düzəltməyə çalışacağıq.

- İlk oyunda uduzsanız da, yenə favorit göstərilirsiz. Bu, komandaya necə təsir göstərir?

- Komandaya heç bir təsir etmir. Biri var ki, favorit sayılmaq, biri də var meydanda sübut etmək.

- Üç il öncə səfərdə "Real"ı məğlub edən komanda "Zirə"ni keçə bilməsə, bu klubda, Moldovada necə qarşılanacaq?

- Təbii ki, "Zirə"dən güclü olduğumuzu göstərmək istəyirik. Bunu sübut etmək niyyətindəyik. Sabah oyunumuz var.

- İlk oyundakı məğlubiyyətdən sonra klub rəhbərliyi sizə sonuncu oyundur dedi?

- Belə söhbət olmadı. Amma onu deyə bilərəm ki, hər məşqçi və hər klub prezidenti qələbə qazanmaq istəyir.

- Rəşad Sadıqovu tanıyırdız? O, "Qarabağ"ın heyətində futbolçu kimi "Şerif"ə qarşı oynayıb...

- Bəli, çox yaxşı tanıyırıq. Köməkçim onunla Türkiyədə oynayıb. Ondan da kifayət qədər məlumat əldə etmişik. Püşk bəlli olandan sonra dərhal ilk işimiz rəqibi və baş məşqçini analiz etməkdir.

- Həmyerliniz Roman Qriqorçuk "Neftçi"yə baş məşqçi təyin edildi. O, Azərbaycan futbolunu yaxşı tanıyır. Qriqorçukla danışıb, "Zirə" haqda məlumat almısız?

- Xeyr, onunla danışmamışıq. O, artıq "Neftçi"yə keçib. "Çernomorets" yığılırdı, o, "Neftçi" ilə toplanışa yollandı. Hazırlıqla məşğul idilər deyə, narahat etmək istəmirdim.

- Bakıya ilk səfərinizdir? Nə vaxtsa, bura gəlmisiz? Azərbaycanda işləmək variantınız olub?

- Bakıya ilk gəlişimdir. 2001-ci ildə Qazaxıstanda, "Aktau"da oynayanda, Bakıya o tərəfdən baxırdım.

- Penaltilər seriyasına hazırlaşacaqsız?

- Bütün ssenariləri düşünmüşük və müvafiq hazırlıqlarımızı görmüşük.