“Komandamın ilk dövrədə çıxışı məni qane etmədi. “Xəzər-Lənkəran” top saxlamaq, hücum qurmaqla ad çıxarıb. Amma keçmiş baş məşqçimiz Rasim Kara müdafiədən oynamağımızı, arxa xəttə daha çox diqqət yetirməyimizi istəyirdi. Komandada bu taktikaya uyğun futbolçu isə çox az olduğu üçün, oyunumuz alınmadı”. Apasport.az saytının məlumatına görə, bu fikirləri “Xəzər-Lənkəran” klubunun yarımmüdafiəçisi Ceyhun Sultanov deyib.

Milli komandada yerini itirən futbolçunun sözlərinə görə, sabiq baş məşqçilər Ağasəlim Mircavadovla Rasim Karanın dövründə komandanın oyunu arasında böyük fərq olub: “Mircavadovun vaxtında daha yaxşı, baxımlı futbol oynayırdıq. Bu da baş məşqçinin tətbiq etdiyi taktikadan çox asılı idi. Yəni, Ağasəlim müəllim əlindəki futbolçulara uyğun taktika qururdu və uğurlu alınırdı. Komanda sırf hücum futbolu oynayırdı. Kara isə pressinqə üstünlük verirdi. Oyundan əvvəl 90 dəqiqə bunu yerinə yetirməyi tapşırırdı. Bunun üçün də gərək əlinin altında lazımi kadr olsun. Oyun boyu pressinq tətbiq etməyə hər futbolçunun gücü çatmır”.

Sultanov Karanın taktikasının onlara uyğun gəlmədiyini və bunun da nəticədə komandanın oyununa mənfi təsir göstərdiyini bildirib: “Xəzər-Lənkəran” arxada qalan dövrədə öz oyununu nümayiş etdirə bilmədi. Təbii ki, eyni sözləri nəticə barədə də söyləmək olar. Bu, çıxış etdiyimiz taktiki sxemdən asılı idi. Yəni, Karanın tətbiq etdiyi taktika bizim oyun üslubumuza uyğun gəlmirdi. Nəticədə, istədiyimiz oyunu nümayiş etdirə bilmədik. Onun verdiyi tapşırıqları meydançada nə qədər yerinə yetirməyə çalışsaq da, alınmırdı. Futbolçuların fiziki hazırlığının aşağı, nizam-intizamın isə zəif olması Karanın şəxsi fikridir. Yəqin onun gözündə belə görünürdük. Karadan xəbər almaq lazımdır ki, indi komanda hansı vəziyyətdədir? Əlbəttə, mövsümün əvvəli ilə müqayisədə daha aşağıdır”.

Ceyhun “Qarabağ”a 1:3 hesablı məğlubiyyətdən sonra Karanı istefaya səsləyən, oyun başa çatmamış stadionu tərk edən lənkəranlı azarkeşlərə haqq qazandırıb: “Mən də “Xəzər-Lənkəran”ın azarkeşi olsaydım və komandam doğma meydanda böyük hesabla uduzsaydı, 80-ci dəqiqədən sonra stadionu tərk edərdim. Sevimli komandasının evdə məğlub olması, həm də qapısından üç top buraxması onlara pis təsir edib. “Xəzər-Lənkəran”ın azarkeşləri belə məğlubiyyətlərə öyrəşməyiblər. Biz evdə həmişə yaxşı oyunumuzla və qazandığımız qələbələrlə onları sevindirmişik. Azarkeşlər hazırkı mənzərə ilə qarşılaşdıqlarına görə məyusdurlar”.

Yeni baş məşqçi İqor Ponomaryovun dövründə hər şeyin yaxşılığa doğru dəyişəcəyinə inanan Ceyhun “Xəzər-Lənkəran”ın məqsədinin dəyişmədiyini sözlərinə əlavə edib. Yarımmüdafiəçi yenə qızıl medallar uğrunda mübarizə aparacaqlarını söyləyib: “Layiq olduğumuz pillə zirvədir. Əsas məqsədimiz yaxşı oyun nümayiş etdirmək və layiq olduğumuz pillədə qərarlaşmaqdır. Bunun üçün əlimizdən gələni əsirgəməyəcəyik. Zədəmi yeni sağaltdığım üçün, əvvəlki formamı bərpa etmək üçün tez-tez meydana çıxmalı idim. Yəni mənə start heyətdə şans verilməli olduğu halda, Kara bunu etmədi. Halbuki mənə cəmi 1-2 matçda "11-lik"də yer almaq kifayət edərdi. Məşq etməklə heç bir futbolçu formasını tam bərpa edə bilməz. İkinci dövrəyə canla-başla hazırlaşıb, əsas heyətdəki yerimi yenidən qaytarmağa çalışacağam. Sadəcə, mənə güvənmələrini, istəyirəm. İnansalar, istəyimə nail olacağam”.

Qeyd edək ki, Sultanov “Xəzər-Lənkəran”da çıxış etdiyi iki ildə ölkə çempionluğu, iki dəfə ölkə kubokunu qazanıb.

• “Qalatasaray”dan 30 milyon avroluq transfer - RƏSMİ
• “Braqa”dan “Qarabağ”a Çempionlar Liqası təbriki - VİDEO
• "Bayer" "Qarabağ" travmasını unutmayıb: Adminləri qorxur - FOTO
• "Tottenhem" niderlandlı futbolçu üçün hərəkətə keçib
• "Milan" Nkunku ilə razılaşıb