“Neftçi TV” fəaliyyətini davam etdirir”

Apasport.az xəbər verir ki, bu sözləri “Neftçi”nin media üzrə koordinatoru Rüstəm Əfsərli deyib.

Klub rəsmisi bildirib ki, hazırda yeni studiyanın qurulması prosesi gedir: “Neftçi TV” yeni ofisə – “Palms Sports” Futbol Mərkəzinə köçürülür. Hazırda işlər davam edir və bu, müəyyən vaxt tələb edir. Daha sonra geniş yayım məsələsi yenidən gündəmə gətiriləcək. Yutub platformasında canlı yayımlarımız isə əvvəlki kimi davam edəcək”.

Əfsərli qeyd edib ki, 6 saatlıq yayımın 90 faizini köhnə kontentlər təşkil edirdi: “İş davam edir. Sadəcə vaxtı keçmiş, boyatlaşmış çıxışların qarşısını almışıq. Gələcəkdə ehtiyac yarandığı halda, yenidən Audiovizual Şuraya müraciət edərək lisenziya almaq hüququmuz var. Bu, əslində dondurmadır, ləğv etmə deyil. Klub böyüdükcə, kanal da böyüyəcək. Yeri gəlmişkən, Audiovizual Şuraya dərin təşəkkürlərimi bildirirəm. Onlarla çox yaxşı əməkdaşlığımız var”.

Onun sözlərinə görə, “Neftçi”nin yutub kanalı Azərbaycanda klub kanalları arasında ən yaxşısıdır: “Bunu hazırladığımız kontentlərdən də görmək mümkündür. Ötən mövsüm akademiyanın 100-dən çox oyununu məhz bu platforma vasitəsilə canlı yayımlamışıq. Atılan addım müasir dövrün tələblərinə uyğun şəkildə düşünülüb. Lisenziyaya əsasən, gündəlik minimum 6 saat yayım vermək məcburiyyətində idik. Son 1-2 ildə bu tələb səbəbindən köhnə videoçarxları yayımlamağa məcbur qalırdıq. Studiyanı yenilədikdən sonra isə elə günlər ola bilər ki, yayımlarımız 8, hətta 9 saata yaxın davam etsin”.

Qeyd edək ki, Audiovizual Şura"Neftçi TV" üçün "Neftçi Media" MMC-yə verdiyi peyk yayımı həyata keçirməyən platforma yayımçısı lisenziyasını ləğv edib.

• Gəncə futbolu üçün şad xəbər: İlqar Nadiri dövrü rəsmən başa çatdı
• “Şamaxı” “Sumqayıt” səfərindən bir xalla qayıdır - YENİLƏNİB
• İtaliya Superkubokunun final cütü BƏLLİ OLDU
• AMADA-nın icraçı direktoru: "Builki konfrans Konstitusiya və Suverenlik ilinə həsr olunub"
• KL: "Sabah” mübarizəni dayandırdı - YENİLƏNİB