Yaponiya yenidən futbol üzrə dünya çempionatına ev sahibliyi etmək istəyir. Apasport.az saytının məlumatına görə, bunu Yaponiya Futbol Assosiasiyasının prezidenti Motoaki İnukai deyib. O, ölkəsinin 2018-ci və ya 2022-ci ildə baş tutacaq dünya çempionatını keçirmək istədiyini söyləyib.

Yeri gəlmişkən, Tokio 2016-cı il Yay Olimpiya Oyunlarının paytaxtı olmağa da iddialıdır. Bu olimpiadanın təşkil olunacağı şəhərin adı gələn ilin sentyabrında açıqlanacaq. Yaponiyalılar da məhz bundan sonra FİFA-ya müraciət edib-etməyəcəklərini müəyyənləşdirəcəklər.

İnukai vurğulayıb ki, olimpiadanın təşkilat hüququ Tokiya verilərsə, onda gələcəkdə dünya çempionatı keçirilməsinə hazırlıq zamanı infrastruktur məsələsi avtomatik olaraq, həllini tapacaq.

Qeyd edək ki, Yaponiya 6 il öncə Cənubi Koreya ilə birgə ilk dəfə dünya çempionatına ev sahibliyi edib.