Vaqif Sadıqovun məsləhətləri

28.01.2009 - 16:56

Bu gün AFFA-nın inzibati binasında Lisenziyalaşdırma qrupu növbəti seminarını keçirib. AFFA-nın İnformasiya və İctimaiyyətlə Əlaqələr Departamentindən apasport.az saytına verilən məlumata görə, seminar “UEFA-nın klub yarışlarında iştirak etmək üçün Azərbaycan futbol klublarının lisenziyalaşdırılması üzrə milli vəsait”ə (versiya – 2.1) uyğun olaraq, klublarda təhlükəsizlik məsələlərinə məsul şəxslər üçün nəzərdə tutulub. AFFA-nın Lisenziyalaşdırma qrupunun rəhbər müavini İlqar Əliyev, AFFA-nın Təhlükəsizlik və İnfrastruktur üzrə baş mütəxəssisi Ağamehdi Mehdiyev, Peşəkar Futbol Liqasının Təhlükəsizlik Şöbəsinin rəisi Vaqif Sadıqov, Lisenziyalaşdırma qrupunun infrastruktur, kadr və inzibati meyarlar üzrə eksperti Hüseyn Şirəliyevin iştirakı ilə keçirilən seminarda oyunlar zamanı təhlükəsizlik tədbirlərinin görülməsinin vacibliyi klub nümayəndələrinin diqqətinə çatdırılıb. Seminarda ölkə daxili, eləcə də beynəlxalq yarışlar zamanı təhlükəsizliklə əlaqədar həyata keçirilməsi vacib olan tədbirlər, bu sahədə son vaxtlar tətbiq olunan yeniliklər barədə geniş məlumat verilib.