Azərbaycan çempionuna tanış potensial rəqib

22.04.2011 - 08:39

Danimarkanın “Kopenhagen” klubu 9-cu dəfə ölkə çempionluğu qazanıb. Apasport.az saytının məlumatına görə, Stol Solbakkenin çalışdırdığı komanda səfərdə “Lyunqbyu” klubu üzərində qazandığı qələbə (2:1) ilə qızıl medalları artıq özü üçün təmin edib. Buna “Kopenhagen”in ən yaxın izləyicisi olan “Odense”nin evdə eyni hesabla “Nordşelland”a uduzması da şərait yaradıb. Çempion arxada qaldığı 26 oyundan 21-də qalib gəlib, 4-də bərabərliyə qalıb, 1-də uduzub.

Qeyd edək ki, növbəti Azərbaycan çempionu üçün Çempionlar Liqasında növbəti potensial rəqib olan “Kopenhagen” 1998-ci ildə “Qarabağ”ı Kuboklar Kubokunda mübarizədən kənarlaşdırıb.