“Simurq” heyətini daha 3 futbolçu ilə gücləndirib. Apasport.az saytının məlumatına görə, bir müddətdir Zaqatala təmsilçisinə keçidi gündəmdə olan Andrey Rubin nəhayət istəyinə çatıb.

Belə ki, son mövsümü “Qarabağ”ın heyətində keçirən latviyalı yarımmüdafiəçi Ağdam təmsilçisi ilə problemini yoluna qoyduğundan, Sergey Yuranın sərəncamına yollana bilib. Sol cinahda çıxış edən futbolçunun adı artıq iştirak ərizəsinə daxil edilib və o, V tur çərçivəsində “İnter”lə keçiriləcək oyunda meydana çıxa biləcək. Yeri gəlmişkən, Rubinin ölkəmizdə ilk klubu elə “İnter” olub.

“Simurq”un digər transferi də yerli azarkeşlərə yad deyil. Söhbət ötən mövsüm “Gəncə”nin formasını geyinən hücumçu Kristap Qrebisdən gedir. Fuad ismayılovun baş məşqçiliyi dövründə Gəncə təmsilçisinə cəlb edilən forvard uca boyu ilə seçilirdi. 31 yaşlı latviyalının “sarı-qaralar”ın hücum xəttini gücləndirəcəyi istisna deyil.

Əyalət təmsilçisinin son transferi Vidas Alunderis olub. Ölkəsində “Atlantas”, “Jalgiris”, “Jeleznis” klublarının formasını geyinən futbolçu daha çox Ukraynadakı oyunları ilə seçilib. “Tavriya”da özünü yaxşı tərəfdən göstərə bilməsə də, müdafiəçi Xarkov “Metallist”ində uğurlu oyunlar sərgiləyib. 35 dəfə bu klubun heyətində meydana çıxan Alunders daha sonra Polşanın “Zaqlebiya” və Avstriyanın LASK klublarının formasını geyinib. O, Latviya yığmasının da üzvüdür.

• Luçesku VƏFAT EDİB
• “Mançester Yunayted”də yeni müqavilə
• Kayode “Siti” yolunda
• Haci rəsmən Rumıniya millisində
• Braziliya klubunda yeni təyinat