“Barselona”nın yeni transferi Usman Dembele zədələnib. Apasport.az saytının “Mundo Deportivo”ya istinadən məlumatına görə, 20 yaşlı oyunçu La Liqanın ötən gün baş tutan “Xetafe” ilə oyununda sıradan çıxıb.

Matça start heyətində başlayan Dembele 29-cu dəqiqədə ağrılar səbəbindən Delofeu ilə əvəzlənmişdi. Onun sol budundakı əzələlərdən biri qırılıb.

Bu səbəbdən gənc oyunçunun ən yaxşı halda 3-4 ay oynaya bilməyəcəyi gözlənilir.

Qeyd edək ki, bu yay “Borussiya”dan “Barselona”ya keçən fransız oyunçunun transferi üçün 105 milyon avro ödənmişdi.