Əcnəbi hegemonluğuna son və ya Arif Əsədov tarixə düşdü

Azərbaycan Premyer Liqasında əcnəbi baş məşqçilərin hegemonluğuna son qoyulub. Apasport.az saytının məlumatına görə, ölkə çempionatının sonuna 3 tur qalmış çempionluğu rəsmiləşdirən “Neftçi” bu uğura yerli mütəxəssis Arif Əsədovun rəhbərliyi altında imza atıb.

2006/07 mövsümündə “Xəzər Lənkəran”ı çempionluğa daşıyan Ağasəlim Mircavadovun zəfərindən sonra istisnasız olaraq əcnəbi çalışdırıcılar qızıl medallar qazanırdı. Bu 3 illik ənənəyə Əsədov son qoyub. Karyerasında ilk dəfə baş məşqçi kimi çempion olan mütəxəssis ilk dəfə bu sevinci yaşayıb.

Lakin Əsədov fərqli “ampluada” futbolçu kimi 3 dəfə Azərbaycan çempionu olub. 1992, 1995/96 və mübahisəli 1996/97 mövsümlərində ölkə çempionatının qızıl medallarını qazanan futbolçu Əsədov indi də baş məşqçi kimi eyni uğuru elə eyni komanda ilə qazanıb.

Bununla da, Əsədov həm futbolçu, həm də baş məşqçi kimi ölkə çempionu olan ilk mütəxəssis kimi tarixə düşüb. Bunadək Yunis Hüseynov, Əsgər abdullayev və Qurban Qurbanov buna çox yaxın olsalar da sonda baş məşqçisi olduqları komandalar qızıl deyil, daha aşağı əyarlı mükafatla kifayətlənib.

mövsüm çempion
1992 Əhməd Ələsgərov
1993 Ağasəlim Mircavadov
1993/94 KazbekTuayev
1994/95 Mehman Allahverdiyev
1995/96 Kazbek Tuayev
1996/97 Elbrus Abbasov (AFFA versiyası)
Kazbek Tuayev (UEFA versiyası)
1997/98 Mehman Allahverdiyev
1998/99 Mehman Allahverdiyev
1999/2000 Ağasəlim Mircavadov
2000/01 Ağasəlim Mircavadov
2001/02 Sona çatdırılmayıb
2003/04 Kazbek Tuayev
2004/05 Ağasəlim Mircavadov
2005/06 Böyükağa Hacıyev
2006/07 Ağasəli Mircavadov
2007/08 Valentin Xodukin
2008/09 Qyoko Hacievski
2009/10 Kaxaber Sxadadze
2010/11 Arif Əsədov