R.Bayramovdan öncə daha 6 güləşçimiz Yay Olimpiya Oyunlarında iştirak hüququ qazanmışdı. Beləliklə, planetin ən mötəbər idman yarışında ölkəmizin güləş (7 lisenziya), ağır atletika (5), bədii gimnastika (3), boks (2), atletika (2), üzgüçülük (2), taekvondo (1) və cüdo (1) növlərində təmsil olunacağı dəqiqdir. Bu həftə idmançılarımız bir sıra təsnifat turnirlərində qüvvələrini sınayacaqlar. Belə ki, bu gündən etibarən boks üzrə milli komandamız Yunanıstanın paytaxtı Afinada keçiriləcək lisenziya xarakterli yarışda mübarizəyə qoşulacaq. Cüdoçularımız isə aprelin 11-də Portuqaliyanın paytaxtı Lissabonda start götürəcək Avropa çempionatında öz bacarıqlarını nümayiş etdirəcəklər. Aprelin 12-də Bakıda qadınlardan ibarət otüstü hokkey yığmaları arasında yarış başlanacaq. Yeri gəlmişkən, Tahir Zamanın rəhbərlik etdiyi kollektiv 8 günlük mübarizə zamanı turnirin qalibi olarsa, olimpiadada ilk dəfə komanda növündə çıxış edəcəyik. Həmçinin, atıcılarımızın da Yay Olimpiya Oyunlarına yollanmaq şansları var. Stend atıcısı Zemfira Meftahəddinova və güllə atıcısı İradə Aşumova ilə bağlı məsələ aprelin 10-11-də Beynəlxalq Atıcılıq İdmanı Federasiyasının Çinin paytaxtı Pekində keçiriləcək Baş Assambleyasında müzakirəyə çıxarılacaq.