Bakı. Kənan Həsənov-APA-Sport. Azərbaycan üzgüçüləri İngiltərənin Mançester şəhərində keçirilən IX dünya çempionatında uğursuz start götürüblər. “APA-Sport” agentliyinin məlumatına görə, Vaqif Nəsibovun rəhbərlik etdiyi milli komandamızın dörd üzvü bu nüfuzlu yarışın təsnifat mərhələsində mübarizəni dayandırıb. Oksana Hətəmxanova 50 m məsafəyə brass üsulu üzrə üzməkdə 34-cü yeri tutub. 18 yaşlı həmyerlimiz sabah brass üsulu ilə 100 m məsafəyə yarışda mübarizə aparacaq. Qadın millimizin digər üzvü Natalya Filina 100 m məsafəyə sərbəst üsulla yarışda 44-cü olub. 21 yaşlı üzgüçümüz, həmçinin 50 m məsafəyə sərbəst üsulla üzəcək. Tural Abbasov isə iki məsafədə uğursuzluqla üzləşib. 50 m məsafəyə sərbəst üsulla üzməkdə 86-cı olan 18 yaşlı təmsilçimiz, 100 m məsafəyə arxasıüstə yarışda 53-cü yeri tutub. T.Abbasov həmçinin, arxasıüstə 50 m məsafədə yarışacaq. Sonuncu təmsilçimiz Teymur Quliyev 50 m məsafəyə sərbəst üsulla mübarizəni 62-ci pillədə başa vurub. 20 yaşlı üzgüçümüz qarşıdakı günlərdə 50 m baterflyay və 100 m sərbəst üsulla mübarizə aparacaq.
Qeyd edək ki, O.Hətəmxanova ilə T.Abbasov güzəştli kart sayəsində Pekin Yay Olimpiya Oyunlarında çıxış edəcəklər.