Sumqayıtın icra başçısı dünya şöhrətli atletlərlə görüşüb

26.02.2010 - 15:42

Sumqayıt şəhər İcra Hakimiyyətinin başçısı Vaqif Əliyev ölkəmizdə səfərdə olan Ağır Atletika üzrə Avropa Ustalar Komitəsinin nümayəndə heyətini qəbul edib. Apasport.az saytının məlumatına görə, qonaqlar arasında komitə sədri Bill Barton, onun müavini Jan Hinrichsen, dünya şöhrətli veteran ağır atletlər – Vasili Alekseyev (Rusiya), Leonid Taranenko (Belarus), Məhəmməd Nəsiri (İran) və digərləri olub.

Qonaqları salamlayan Əliyev onlara Sumqayıt şəhəri, ölkəmizin idman siyasəti, bu sahədə əldə edilmiş uğurlar haqda geniş məlumat verib. Daha sonra Barton çıxış edərək səmimi qəbula görə şəhər rəhbərinə minnətdarlığını bildirib. Sonda qonaqlara xatirə hədiyyələri təqdim edilib.

Qeyd edək ki, qonaqlar görüşdən sonra Sumqayıtda keçirilən Veteranlar arasında Azərbaycanın 4-cü açıq çempionatında iştirak ediblər.