Bu gün Azərbaycan milli komandası Avro-2012-nin seçmə mərhələsində mübarizəyə başlayıb. Apasport.az saytının məlumatına görə, yığmamız ilk sınağına almaniyalı baş məşqçisi Berti Foqtsun vətənində çıxıb. Ötən seçmə mərhələdə olduğu kimi Almaniya yığması bu dəfə fə bizə gücünü göstərdi.

Lakin Yoahim Lövün yetirmələri bu dəfə daha amansız oldular. Ötən il Bakıda 2:0, Hannoverdə 4:0 hesablı qələbəyə sevinən almaniyalılar bu dəfə iki oyunda vurduğu sayda – 6 topa imza atdılar. Bunlardan birini də komandamızın kapitanı Rəşad Sadıqov öz qapımızdan keçirdi. Tarixində ilk dəfə Almaniya yığmasının qapısına qol vuran millimiz buna kuryoz yolla nail oldu. Vaqif Cavadov, Manuel Noyer və Rail Məlikovdan ibarət “üçbucaq” bu qolda bərabər pay sahibləri oldular.
23:45. ALMANİYA – AZƏRBAYCAN - 6:1
QOLLAR: Vestermann, 28, Podolski, 45, Kloze, 45+1, 90+2, Sadıqov, 53-öz qapısına, Badştuber, 86 - Cavadov, 57
Baş hakim: Markus Strömberqsson (İsveç)
Hakim köməkçiləri: Stefan Vittberq, Fredrik Nilson, Daniel Stalhammer (hamısı İsveç)
Hakim-inspektor: Stefan Ormancev (Bolqarıstan)
UEFA nümayəndəsi: David Georgi Kollins (Uels)
Köln. “Raynenerqiştadium” stadionu
ALMANİYA: 1. Manuel Noyer, 4. Saşa Rieter, 6. Sami Hedira, 7. Bastian Şvaynştayger (19. Kakau, 80), 8. Məsut Özil, 10. Lukas Podolski, 11. Miroslav Kloze, 13. Tomas Müller (21. Marko Marin, 61), 14. Holger Badştuber, 16. Filip Lam (k), 17. Per Mertezaker (5. Heyko Vestermann, 12).
Ehtiyat oyunçular: 22. Rene Adler, 9. Stefan Kisslinq, 18. Toni Kroos, 23. Mario Qomes.
Baş məşqçi: Yoahim Löv
AZƏRBAYCAN: 1. Kamran Ağayev, 2. Rail Məlikov, 3. Saşa Yunisoğlu (13. Vurğun Hüseynov, 58), 4. Mahir Şükürov, 5. Elnur Allahverdiyev, 7. Vaqif Cavadov, 8. Aleksandr Çertoqanov (6. Rəşad Sadiqov, 64), 9. Samir Abbasov, 14. Rəşad Sadıqov (k), 17. Vüqar Nadirov (22. Araz Abdullayev, 85), 18. Maksim Medvedev.
Ehtiyat oyunçular: 23. Səlahət Ağayev, 16. Amit Quluzadə, 19. Rahid Əmirquliuyev, 20. Fabio Luis Ramim.
Baş məşqçi: Berti Foqts

1. Oyuna millimiz başladı.
6. Qapımız ağzında ilk təhlükəli epizod. Kamran onunla üzbəüz qalan Hediranın ayaqlarının altına atılaraq topa yiyələndi.
8. Hava mübarizəsində Cavadovla toqquşan Mertezaker zədələnərək yerdə qalıb. Bu səbəbdən meydanda qısa fasilə yaranıb.
10. Yığmamızın ilk ciddi hücumu. Mertezakerin meydanı tərk etməsi üzündən 10 nəfərlə qalan Bundestimin qapısına sol cinahla hücum edən millimiz kümc zərbəsi qazandı. Vaqifin ötürməsini Şvaynştayger küncə çıxardi. Bundan sonra isə Rail qapıya qeyri-dəqiq zərbə vurdu.
12. Zədələnən Mertezaker Vestermannla əvəzləndi.
15. Şvaynştaygerin cərimə zərbəsi müdafiəçilərimizə dəyib küncə çıxdı.
16. Künc zərbəsini də Bastian yerinə yetirdi. Qapımız ağzındakı təhlükə Vestermannın baş zərbəsi ilə başa çatdı.
17. Sadıqov bir hücum ərzində 3 dəfə almaniyalıların qarşısını kəsməyi bacardı. Sonuncu vəziyyətdə o, topu küncə çıxardı.
18. Kapitanımız növbəti epizodda da Müllerin qarşısını aldı
19 Saşa cərimə meydanının xətti üstündə Klozeyə qarşı kobud oynadı. Təhlükəli cərimə zərbəsi.
20.Podolskinin cərimə zərbəsindən sonra Kamran topa sahib oldu. Az keçməmiş qapıçımız Müllerin qapı ağzına göndərdiyi ötürmənin də qarşısını aldı.
22. Lukas Podolski cərimə meydanına daxil olmadan güclü zərbə vurdu. Top qapının üstündən keçdi.
24. Yığmamızın nadir hücumlarından birində Mahir in zərbəsində dəqiqlik çatmadı.
25. Podolskinin zərbəsindən sonra Kamran topu küncə çıxardı. Künc zərbəsindən sonra Vestermann təhlükəli zərbə vurdu
26. Yenə Podolskidən təhlükə: bu dəfə onun baş zərbəsindən sonra alman azarkeşlər məyus oldular.
28. Qapımız ağzında növbəti təhlükə qolla başa çatdı. Vestermannın ilk zərbəsini Kamran dəf etsə də təkrar zərbə Köln stadionunu ayağa qaldırdı – 1:0.
33. Riterin cinah ötürməsindən sonra Kloze topa çatmadı. Saşa Yunisoğlu adaşını qabaqlayaraq topu küncə çıxardı.
36. Nadirov 28-30 metrdən Noyerin qapısına yol tapmaq istədi. Qapıçı çətinlik çəkmədən topa yiyələndi.
37. Qapımız ağzında qarışıqlıqda Abasov cəld tərpənərək topu uzaqlaşdırdı.
38. Bu dəfə bəxtimiz gətirdi. Hedira iki müdafiəçinin arasında əla ötürmə versə də Özil topa çatmadı.
39. Növbəti epizodda isə Yunisoğlu komandamızı xilas edib təhlükəni uzaqlaşdırdı.
42. Yığmamız Noyeri həyəcanlandıra bildi. Alman qapıçı Cavadovun ayaqları altına atılaraq hücumçumuzun topa toxunmasına da imkan vermədi.
45. Müdafiə xəttimizdə yaranan boşluqdan yararlanan almanlar cərimə meydançamızda istədiyi kimi oynayaraq hesabı artırdı. Özillə divar paslaşmasından sonra Podolski doğma Köln publikasını sevindirdi – 2:0.
45+1. Yığmamız buraxılan qoldan sonra özünə gəlməmiş qapısında daha bir top gördü. Futbolçularımızın daha bir kobud səhvindən sonra Podolski ilə Kloze qapıçımızla üz-üzə qaldı. Simiclik etməyən Lukas topu komanda yoldaşına ötürdü. O, isə bu şansı qaçırmadı.
Komandalar fasiləyə 3:0 hesabı ilə çıxdılar.

46. İkinci hissə başladı. Elə ilk hücumda Kamran oyuna daxil oldu. O, Lamın təhlükəli zərbəsini dəf etdi.
48. Abasov dizindən zədələnsə də oyunu davam etdirir.
50. Hediranın qapıçı ilə üz-üzə qalmasına öz dabanı mane olur. Arxadan ötürmə ona toxunduğundan hücum dayandı.
51. Klozenin ötürməsindən sonra Müllerin zərbəsi qeyri dəqiq oldu.
53. Heditanın qapı qarşısına göndərdiyi topu uzaqlaşdırmaq istəyən Sadıqov yığmadakı ikinci avtoqolunu vurdu.
57. Foqts müdafiəyə yeni qüvvə qatmaq məqsədilə Yunisoğlunu Hüseynovla əvəzlədi.
58. Millimiz rəqib qapısına da qol vurdu. Bu top kuryoz alındı. Cavadovun künc zərbəsindən sonra topu qaytaran Noyer kobud səhvə yol verdi. Onun üstünə yıxılıb əzdiyi Railə toxunan top qapıdan keçdi. UEFA bu qolu künc zərbəsinin müəllifi olan Vaqifin adına yazdı.
64. Kamran Podolskinin qapı qarşısına ötürməsinin qarşısını aldı.
65. Foqts Çertoqanovu Sadıqovla əvəzlədi.
69. Oyunun taleyini həll edən almaniyalılar xeyli arxayınlaşıblar. Topa nəzarəti əlində saxlayan Bundestim qapımız ağzında ciddi təhlükə yaratmağa o qədər də can atmır. Komandamız isə müdafiə olunmaqda davam edir.
72. Özilin qapıya paralel ötürməsi təhlükəli olsa da topu qapıya yönəldən tapılmadı.
73. Matçın ən fəallarından olan podolkinin qapımıza növbəti zərbəsi də qeyri dəqiq oldu.
77. Şvaynştayger Sadiqovla mübarizədə qaydanı pozdu.
80. Löv Bastianı da əvəzlədi.
83. Kakaunun güclü zərbəsi düz Kamranın üstünə tuş gəldi.
85. Foqts alman publikası önünə onlara təriflədiyi Arazı buraxdı.
86. Künc zərbəsindən sonra Badştuber 5-ci qolu da qapımızdan keçirdi
90+2. Sol cinahda istədiyini edən Podolskinin növbəti ötürməsindən sonra Kakau dabanı ilə topu Klozeyə istiqamətləndirdi. O, isə matçda ikinci, seçmə mərhələdə üçüncü qolunu rəsmiləşdirdi.
Oyun başa çatdı.

• Bilyardın "Snuker" növü üzrə ölkə çempionatının qalibləri bəlli olub - FOTO
• Millimiz təlim-məşq toplanışına start verib
• III MDB Oyunlarında fəaliyyət göstərəcək könüllülərin sayı açıqlanıb - FOTO
• “Snuker” növü üzrə Azərbaycan çempionatı keçiriləcək
• Fəridə Əzizova Atletlər Komissiyasının sədri seçilib - FOTO