“Bu gün məncə, bu idman növünün iştirakçıları və həvəskarları üçün əsl bayram günü oldu”.
Bu sözləri Azərbaycan Kamandan Oxatma Federasiyasının prezidenti Anar Quliyev ölkə birinciliyinin final mərhələsindən sonra jurnalistlərə açıqlamasında deyib.
Onun sözlərinə görə, dövlət rəhbərliyi tərəfindən idmana, xüsusən də kamandan oxatma növünə böyük önəm verilir: “Bir neçə ildir ki, federasiya olaraq bu cür yarışları daha fərqli və yüksək səviyyədə keçirmək üçün əlimizdən gələni edirik. Ümid edirəm ki, bu, alınır. Ötən ilki yarışdan fərqli olaraq, bu il üç yaş kateqoriyası üzrə 60 idmançı mübarizə apardı. Təxminən gender balansı da qorunub. Lakin səmimi olsaq, qadın idmançıların sayı üstünlük təşkil edir. Bu çempionatda yeni istedadlarımızı da gördük”.
Federasiya rəhbəri gələcəkdə yarışların bölgələrdə də keçirilə biləcəyini istisna etməyib: “Bu günə qədər ölkə çempionatı həmişə paytaxtda təşkil olunub. Bildiyiniz kimi, bu yarış ildə iki dəfə keçirilir. Amma mən düşünürəm ki, gələcəkdə həm ölkə çempionatları, həm də yeni yaradılacaq turnirlər rayonlarda da baş tuta bilər”.
Anar Quliyev, həmçinin, bu ilin sentyabrında start götürəcək III MDB Oyunlarına da toxunub: “Bu, ölkəmiz üçün çox vacib idman tədbiridir. Yarış bir neçə şəhərimizdə keçiriləcək. Kamandan oxatma üzrə yarışlar isə Xankəndidə baş tutacaq. Bu, qürurverici haldır. Hazırlıqlar çox ciddi şəkildə davam edir. İnanırıq ki, idmançılarımız ölkəmizi bu yarışda layiqincə təmsil edəcəklər”.
Oxşar xəbərlər
Ana səhifə
Bütün xəbərlər