“Turnirdə ilk oyunumuzu keçirdik. Rəqibimiz daha təcrübəli Fransa yığması idi. Bizim heyət üzvləri ilk dəfə idi beynəlxalq oyunda iştirak edirdi. Düzdür, komanda sentyabrdan Yüksək Liqada iştirak etməklə müəyyən təcrübə əldə edib. Amma beynəlxalq oyunlar fərqli keçir".

Apasport.az xəbər verir ki, bunu 19 yaşadək futzalçılardan ibarət Azərbaycan millisinin baş məşqçi əvəzi İlqar Aslanov deyib. O, Avropa çempionatının əsas mərhələsi çərçivəsində Fransa yığması ilə keçirilmiş oyun (0:5) haqda azfutzal.az-a açıqlama verib:

"Matça gəldikdə, görüş bizim üçün çətin keçdi. Yenə deyirəm, rəqibimiz bu cür bir neçə oyunda iştirak etdiyindən, daha təcrübəli hesab olunurdu. Razı qaldığım məqam uşaqların heç nədən çəkinmədən sona qədər mübarizə aparmasıdır. Ustalıq səviyyəsində onlardan geri qalsaq da, oyunçularımız əzmkarlıq hesabına nəsə etməyə çalışırdı. Qarşıda daha 2 oyunumuz var. Əlbəttə, çalışacağıq ki, xal və ya xallar qazanaq”.

Qeyd edək ki, U-19 millimiz martın 23-də meydan sahibi Bosniya və Herseqovina ilə, martın 25-də Yunanıstanla qarşılaşacaq.