Konfrans Liqasının V turunun “Dinamo” (Minsk, Belarus) - “Larne” (Şimali İrlandiya) matçından (2:0) sonra meydan sahiblərinin kapitanı Roman Bequnov apasport.az saytına müsahibə verib.
- Oyun haqqında düşüncələrin… Hesabdan məmnun qaldın?
- Biz bu qələbəyə çox sevinirik. Əvvəlki oyunda buna çatmaq çox uzun çəkdi. Məncə, oyun keyfiyyətimizə əsaslanaraq, 4-dən artıq qol vurmağa layiq idik. Yaxşı ki, qələbə qazandıq.
- Pley-off şanslarınızı necə qiymətləndirirsən?
- İndi bu haqda danışmaq kifayət qədər çətindir. Şanslarımız çox deyil. Paralel oyunlarda şansa həqiqətən ehtiyacımız var. Təəssüf ki, əvvəlki oyunlarda müəyyən sayda xal qazana bilmədik. İndi isə çətindir. Amma son oyunda əlimizdən gələni etməyə çalışacağıq. Bu, bizdən və final fitindən sonra hara çatacağımızdan asılıdır.
- Növbəti rəqib “Panatinaikos”dur. Necə düşünürsən, rəqibi məğlub edə biləcəksiz?
- Çox yaxşı, məşhur klubdur. Böyük azarkeşlərə malikdirlər. Bizimlə görüşə də çoxsaylı fanatlar gələcək. Bu, böyük komanda ilə futbol atmosferində oynamaq üçün əla şansdır. Bizi yalnız yaxşı oyun gözləyir.
- Azərbaycana artıq 3 səfər etmisiz. Sumqayıt və Bakı haqqında nə deyə bilərsən?
- Çox qonaqpərvər millətsiz. Bizə burda gözəl stadion təşkil etməkdə əməyi olan hər kəsə çox təşəkkür edirəm. Azərbaycanlı azarkeşlərin oyunlara qatılmasına icazə verilsəydi, çox yaxşı olardı. Amma çətin vəziyyətimizdə bizə verilən fürsət üçün sonsuz minnətdarıq. Bizi burda çox yaxşı qarşıladılar.
- Azərbaycanda çıxış edən belaruslu futbolçular barədə nə deyə bilərsən?
- Yeqor Boqomolski və Yeqor Xvalko ilə bağlı məlumatım var. Amma düzünü desəm, çox da maraqlanmamışam. Heç biri ilə şəxsi tanışlığım yoxdur.
İsmayıl Xeyrullayev
Oxşar xəbərlər
Ana səhifə
Bütün xəbərlər
Hesabım