Azərbaycanda uzun illər legioner həyatı yaşamış, “Neftçi”nin sabiq futbolçusu Denis Silva Kruz apasport.az saytına müsahibə verib.

- Deyəsən, aktiv futbolçu karyeranı başa vurmusan. Artıq futbol oynamırsan? Nə işlə məşğulsan?
- Bəli, düzdür. Artıq peşəkar səviyyədə futbol oynamıram. Amma yaşadığım rayonda həvəskar futbol oynamağa davam edirəm. Mən bir dostumun mağazasında işləyirəm. Gələcək layihələrə hazırlaşıram.

- Maraqlıdır, heç Azərbaycan futbolunu və "Neftçi"ni izləyirsən? Azərbaycan futbolu və "Flaqman" sənin üçün maraqlıdır?
- Təəssüf ki, saat fərqinə görə oyunlara baxa bilmirəm. Lakin çempionatı və “Neftçi” komandasını sosial şəbəkədən izləyirəm. Mən hələ də çox güclü əlaqəyə malik olduğum üçün Azərbaycan futbolunda hər şeyi öyrənməkdə maraqlıyam.

-"Neftçi" Adrian Mutunu baş məşqçi postundan göndərdi. Onun əvəzinə Miodraq Bojoviçi gətirdilər. O, “Srvena Zvezda”, “Lokomotiv” (Moskva) klublarını çalışdırıb. “Neftçi”də baş verən bu proseslər haqda fikrin necədir?
- Bir çox klublarda bu cür yanaşma var: onlar məşqçilərdən dərhal nəticə istəyirlər və istədikləri kimi alınmazsa, sonda məşqçiləri işdən çıxarırlar. Böyük komandalardakı təcrübəsinə görə Miodraq Bojoviçin gəlişinin çoxlu qələbələr gətirəcəyi gözlənilir. Ümid edirəm ki, nəticə verəcəkdir.
- Bojoviçin qarşsına qoyulan hədəf: Premyer Liqada ikinci yer və ölkə kubokudur. Səncə, Bojoviç bunu bacaracaq?
- Bojoviçin buna nail olması üçün o, oyunçuların inamına ehtiyac duyur və onları motivasiya edir. Çünki izlədiyim kimi, “Neftçi”də yüksəlmək şansı olan yüksək keyfiyyətli oyunçular var. 

- Maraqlıdır, heç "Neftçi"nin heyətində hazırda tanıdığın oyunçu var? Hansı futbolçunu bəyənirsən?
- Azər Salahlı, Rəhman Hacıyev, Filip Ozobiç, Emin Mahmudov, Qara Qarayev - mənim vaxtımda oynayan futbolçular. Mən həmişə Qara Qarayevə azarkeşlik etmişəm. Amma Emini çox bəyənirəm. Çünki o, özünü hazırda Azərbaycanın ən yaxşı oyunçularından biri kimi göstərib. Amma mənim heyranlığımı artırmaq üçün onların hər ikisi “Neftçi”yə daha çox kuboklar qazandırmalıdır.

- Hazırda "Neftçi" 2 braziliyalı oynayır : Andre Şinyaşiki və Yuri Matias. Şinyaşiki çox tənqid edilir. Çünki xeyir verə bilmir, effektli deyil. Matias isə azarkeşlər tərəfindən çox sevilir...
- "Neftçi"nin heyətində braziliyalı olmaq asan deyil. Çünki tələb həmişə yüksəkdir, komandada tarix yazan və gələnlərə çox yüksək tələbat qoyan futbolçular var. Azarkeşlər tələb edir. “Neftçi”nin böyüklüyü buna uyğundur. Ona görə də “Neftçi”yə keçən hər bir braziliyalı bu formanı geyinməyə layiq olduqlarını göstərməli və irsimizə hörmət etməlidir.

- Səncə, nəyə görə "Neftçi" "Qarabağ"la başabaş mübarizə apara bilmir? "Neftçi"yə mane olan nədir? 
- Həmişə "Qarabağ"ın böyüməsindən danışırdım. İllər boyu eyni oyunçu bazası ilə çalışdılar ki, oynamaq üçün bir yol tapdılar. Qurban Qurbanov lazım olanı əldə etdikdən sonra səbr və işləmək üçün vaxt tapdı, titullar qazanmağa başladı və sonra yavaş-yavaş yeni oyunçular transfer edildi. Baxın, Qurban Qurbanov nə vaxtdan "Qarabağ"ın baş məşqçisidir. “Neftçi”də məşqçi dəyişikliyi problemi var. Onlar dərhal nəticə istəyirlər, bu da məşqçilərin işini çətinləşdirir, taktiki sxemə uyğunlaşmaq lazımdır. Hər rolu hansı futbolçunun daha yaxşı yerinə yetirməsi də önəmlidir. Bir gecədə etmək mümkün olmayan çox şey var.

- Sən oynadığın vaxtlarda "Neftçi" "Qarabağ"ı necə üstələyirdi?  
- Komandamız yekdil idi. Hamı bir-biri üçün mübarizə aparırdı, təkcə meydanda deyil, ondan kənarda da yaxşı anlaşırdıq. Biz bir ailə olmuşduq, hamı ilə, yerli və əcnəbi oyunçularla anlaşmışdıq, hamı ilə ünsiyyətdə çox yaxşı olduğumuz anlar yaşadıq. Bu, bizi bir araya gətirdi, bir-birimizi daha yaxşı tanımağa imkan verdi. Hazırda “Qarabağ”ı məğlub etmək üçün nə etmək lazımdır bilmirəm. Nə baş verdiyini anlamaq və kömək edə bilmək üçün komandanın bir hissəsi olmalıyam.

- Niyə Azərbaycanda işləmək istəmirsən? Azərbaycan dilini də yaxşı bilirsən...
- Bəzi layihələr planlaşdırıram, hər şey qaydasında olsa, bu vəziyyəti nəzərdən keçirə bilərəm. Kim bilir, bəlkə mən də "Neftçi"nin məşqçisi olacam və məşqçi kimi də kuboku qaldıracam.

- Maraqlıdır, uzun illər Azərbaycanda oynamışdın. Heç Azərbaycan millisində oynamaq variantın var idi? AFFA-dan təklif almışdın?
- AFFA-dan heç vaxt təklifim olmayıb. Azərbaycan millisində oynamaq istəyirdim, mənim üçün şərəf olardı. Azərbaycandan çox adam bu haqda məndən soruşdu. Amma təəssüf ki, dəvət olmadı. Formanı geyinib Azərbaycan millisini müdafiə etməkdən çox məmnun olardım. Amma üzülmürəm, çünki bilirdim ki, onların Azərbaycanı müdafiə edəcək çox bacarıqlı oyunçuları var.