“Sumqayıt”la qarşılaşmanın birinci hissəsində yaxşı oynamadıq. Fasilədən sonra toparlandıq, baş məşqçinin bizdən istədiyini meydanda tətbiq etməyə çalışdıq”.

Apasport.az saytının məlumatına görə, bunu “Araz-Naxçıvan”ın futbolçusu Vanderson Melo deyib.

29 yaşlı yarımmüdafiəçi klubun mətbuat xidmətinə açıqlamasında Misli Premyer Liqasının IV turunun “Sumqayıt”la qarşıdakı matçı barədə danışıb: “Yəni ikinci hissədə öz oyunumuzu nümayiş etdirməyi bacardıq.  İndiyə qədər Premyer Liqada 4 görüş keçirmişik. Komandamız yeni qurulub, hətta elə alındı ki, gecə yol gəlib, səhər meydana çıxan futbolçumuz oldu. Buna görə də adaptasiya üçün vaxta ehtiyac var. Demək olar, heyətimizin 90 faizi yenidir. Amma arxada qalan 4 oyunu analiz etsək, “Qarabağ”a qarşı daha yaxşı oynadığımızı deyə bilərəm. İlk matçımız da pis alınmadı. Fərqlənmək üçün epizodlarımız oldu. Təəssüf ki, hər iki görüşdə uğur qazana bilmədik. Adaptasiya prosesini tez keçsək, nəticələrimiz yaxşılaşacaq”.

Braziliyalı legioner qarşıdakı V tur barədə fikirlərini də açıqlayıb: “Kəpəz”lə oyunumuz maraqlı keçəcək. Onlar da xoş təsir bağışlayırlar. Məncə, ilk mini finalımız olacaq. Turnir cədvəlində 4 komandanın 4 xalı var. Bu baxımdan matçı final hesab etmək olar. Qələbə qazanan bir addım önə keçəcək. Yaxşı hazırlaşırıq, baş məşqçinin dediklərini düzgün etməyə çalışırıq ki, yekunda yaxşı nəticə qazanaq. Həm də bu oyun Bakıdan kənarda keçirəcəyimiz ilk matç olacaq”.

Vanderson çempionatın maraqlı keçməsinə də toxunub: “Misli Premyer Liqası maraqlı keçir. İstər turnir cədvəlinə baxsaq, istərsə də oyunlara diqqət yetirsək gərgin mübarizənin getdiyini görürük. Bütün komandalar meydana qələbə qazanmaq məqsədilə çıxır. Bu, yaxşı haldır. Hazırda bizim komandada adaptasiya prosesi gedir. Oyunçuların uyğunlaşması başa çatdıqdan sonra daha yaxşı oynayacaq, uğurlu nəticələrimizlə sevindirəcəyik. Özüm komandaya və ölkənizə tam uyğunlaşmışam. Bura gələnə qədər Ukrayna və Belarusda da forma geyinmişəm. Premyer Liqanız Ukrayna çempionatına daha yaxındır. Rus dilində də qismən danışıram, bu da çox köməyimə çatır. Komandada İqor Ribeyro və Nuno Rodrigeslə daha çox ünsiyyət qururam. Onlar portuqal dilində danışırlar. Rus dilini bilməyim də köməyimə çatır. Burada darıxmıram”.