“Bakıda keçirilən Avropa kubokunda çıxışımdan razı qaldım”.

Apasport.az xəbər verir ki, bunu paytaxtımızda təşkil olunan bədii gimnastika üzrə Avropa kubokunun qalibi Boryana Kaleyn deyib.

Bolqarıstanlı gimnast Bakıda 2 qızıl medal qazanıb. Kaleyn topla və lentlə çıxışda fəxri kürsünün ən yüksək pilləsində yer alıb. O, yeni formatın maraqlı olduğunu bildirib: “Çıxışımı uğurla başa vura bildim. Maraqlı formatda ilk dəfə keçirilən Avropa kubokunda qələbə qazandığım üçün çox şadam. Bu yarış Budapeştdə təşkil olunacaq Avropa çempionatı və Paris-2024 Olimpiadası öncəsi yaxşı sınaq oldu”.

Kaleyn turnirin təşkilatçılığını yüksək qiymətləndirib: “Burada komandalar güclü heyətlə çıxış edirdilər. Təşkilatçılıq yüksək səviyyədə idi. Möhtəşəm zal və atmosfer, azarkeşlərin dəstəyi – hər şey əla təşkil olub”.

Qeyd edək ki, ilk dəfə təşkil olunan Avropa kubokuna bu gün yekun vurulacaq.