İran əsilli Monqolustan cüdoçusu Səid Mollai Azərbaycan millisində çıxış etmək istəyir.

Azərbaycan Cüdo Federasiyasından apasport.az saytına verilən məlumata görə, 30 yaşlı idmançı bununla bağlı quruma müraciət edib.

81 kq çəki dərəcəsində mübarizə aparan Mollai mövcud hazırlıq vəziyyətinin dəyərləndirilməsi üçün Bakıya dəvət olunub və yığmanın Avropa çempionatına hazırlıq məqsədilə keçirilən təlim-məşq prosesində iştirak edib. Cüdoçu həmçinin müvafiq tibbi müayinələrdən keçirilib.

Hazırda federasiya rəhbərliyi onun Azərbaycan adından çıxış etməsi ilə bağlı müraciətini dəyərləndirir. Həmçinin buna son icazəni verməli olan Beynəlxalq Cüdo Federasiyası ilə müvafiq məsləhətləşmələr aparılır.

Qeyd edək ki, Səid Mollai 2018-ci ildə Bakıda keçirilən dünya çempionatının qalibi olub. O, həmçinin 2017-ci ildə paytaxtımızda təşkil olunan İslam Həmrəyliyi Oyunlarında qızıl medal qazanıb. Mollai Tokio-2020 Yay Olimpiya Oyunlarının gümüş mükafatçısıdır.

• Azərbaycan Kamandan Oxatma Federasiyasında idmançılara yeni idman dərəcələri təqdim edilib
• Qaşım Maqomedov: "Bu medal mənim üçün böyük əhəmiyyət kəsb edir"
• Yenilənmiş Olimpiya medalları idmançılarımıza təqdim edilib
• “Azərbaycan Qolf Federasiyası” İctimai Birliyinin yığıncağı keçirilib
• Velosipedçilərimiz beynəlxalq “Tour of Mersin” yarışına qatılıblar