Azərbaycan Premyer Liqasında 2024/2025 mövsümünün ilk yarısını turnir cədvəlində ikinci pillədə başa vuran “Araz-Naxçıvan”ın baş məşqçisi Elmar Baxşıyev apasport.az saytına müsahibə verib.
- “Araz-Naxçıvan” mövsümün ilk yarısını ikinci pillədə başa vurdu. Maraqlıdır, mövsümün ilk yarısında minimum hədəf nə idi?
- Qarşıdan gələn bayramlar münasibəti ilə siz başda olmaqla, redaksiya əməkdaşlarınızı təbrik edirəm. Açığı, turnir cədvəli ilə bağlı heç vaxt hədəf müəyyənləşdirmirik. Yəni futbolçuya demirik ki, 3 və ya 5 turdan sonra 3-cü, 10 turdan sonra 2-ci pillədə olmalıyıq. Hər oyuna uyğun hədəf müəyyənləşdiririk. Yəni həftə ərzində məşq prosesində etdiklərimizi oyunda mənə qaytarın. Bunu etdikdə, nəticə də istədiyimiz kimi olacaq.
- Komandanız sonuncu turda "Qarabağ"a 0:2 hesabı ilə məğlub oldu. Həmin oyunda məğlubiyyət, sizcə, nə ilə əlaqəli idi?
- “Qarabağ”ın gücü və heyəti müqayisəolunmazdır. Ancaq biz heç vaxt futbolçuya demirik ki, bu oyunu uduzmaq da olar. Sona qədər mübarizə aparmalıyıq. Qol vurduq, bəlkə də həmin qol sayılsaydı, oyunun gedişi fərqli olardı. “Qarabağ”ın qələbəsinə kölgə salmıram. Amma komandam da yaxşı oynadı.
- Həmin matçda Felipe Santosun vurduğu qola ofsayd qərarının verilməsinə çox narazı qalmışdınız. Yəqin ki, həmin epizoda artıq bir neçə dəfə baxmısız. Sizcə, orada hakim doğru qərar verir, yoxsa qolu qaydalar çərçivəsində vurmuşdunuz?
- Qaydaların yozumu çox dəyişib. Məsələn, “Sabah”la oyunda Felipeyə qarşı kontakt var idi, amma hakim bunu yüngül toxunuş kimi qiymətləndirdi və penaltı təyin etmədi. Bunu anlaya bilmədim: toxunuş varsa, nə yüngül, nə ağır? Toxunuşun gücü cəriməyə yox, cəzaya, yəni sarı və ya qırmızı vərəqə olmasına təsir edə bilər. Daha qərara təsir etməz. “Qarabağ”la oyunda da Ramon Maçado topa toxunmamışdı. Amma hakimin fikrincə, aktiv ofsayd idi... Artıq qaydaların yozumunu anlamaq çətindir.
- Ümumiyyətlə maraqlıdır, hakimlər "Araz-Naxçıvan"a qarşı çempionatın ilk yarısında təzyiq göstərdi? Yoxsa, hakimlikdən əziyyət çəkmədiyinizi düşünürsüz?
- Hakimlərlə bağlı danışmaq istəmirəm. Səhv bütün oyunlarda olur. Ümid edirəm ki, qərəzli deyil.
- Bəs, mövsümün ilk yarısında komandanızın ən baxımlı və ən razı qaldığınız oyun hansı idi? Bu cür xüsusi görüş var?
- Oyunları seçmirəm. Hər matçda qarşıya məqsəd qoyulur və uşaqlar ona çatmaq üçün mübarizə aparır. Bütün oyunlar maraqlı idi.
- Yəqin ki, qış transfer pəncərəsi önəmli olacaq. Bu qış komanda sizcə hansı mövqelərdə güclənməlidir? Baş məşqçi kimi sıxıntı çəkdiyiniz, daha çox güclənməli olduğunuz mövqə hansıdır?
- Gücləndirmək istədiyimiz mövqelər var. Xüsusilə, hücum xəttinə əlavə etmək istəyirik. Axtarışlar davam edir. Say artırmaq xatirinə transfer etmək istəmirik.
- Mövsümün gedişində daha diqqətçəkən məqam yəqin ki, Qara Qarayevin komandaya cəlb olunması və qısa zamanda kollektivə, oyununuza adaptasiya olması idi. Hətta "Turan Tovuz"la vacib görüşdə Santosa həlledici ötürməni də vermişdi. Orta xətdəki rəqabətin çox güclü olduğunu düşünürsüz? Çünki orada Vadim, Qara, Mustafa, Jatoba var..
- Əslində, bütün mövqelərdə güclü rəqabət olmalıdır. Bu tək komandanın yox, futbolçuların da xeyrinədir. Çünki arxayınlaşmırlar, nə də heç kim düşünmür ki, məndən başqası yoxdur, onsuz da oynayacam. Qara təcrübəli futbolçudur və bu cür oyunçunun kənarda qalması futbolumuz üçün də yaxşı deyildi.
- “Araz-Naxçıvan" mövsümün sonunda avrokuboklara böyük ehtimalla vəsiqə qazanacaq. Sizin üçün qışdan sonra hansı maneələr ola bilər? Hansısa təhlükə hiss edirsiz?
- Hələ mübarizə qarşıdadır. Çempionatın ən çətin dövrü başlayır. Daha doğrusu, mövsüm yeni başlayır. Qışda komandalar güclənəcək, yaxşı hazırlıq keçəcək. Biz də ansambldan geri qalmamalıyıq. Təhlükə hər zaman var. Əsas öz komandamın hazır olmasıdır.
Oxşar xəbərlər
Ana səhifə
Bütün xəbərlər
Hesabım