“Qalatasaray”ın qadın voleybolçularından ibarət komandası Bakıya məğlub gəlir. Apasport.az saytının məlumatına görə, İstanbul klubu keçirdiyi son oyunda, Türkiyə çempionatının VIII turunda “Əczaçıbaşı”na uduzub (1:3). Bu uğursuzluğun ardından “Qalatasaray” 4-cü pilləyə enib.

“Cim Bom” “Çağırış kuboku”nun ikinci mərhələsində “İqtisadçı” ilə cavab görüşünü keçirmək məqsədilə bu gün paytaxtımıza təşrif buyuracaq. Oyun sabah saat 16:00-da Bakı İdman Sarayında baş tutacaq. “İqtisadçı” mərhələ adlamaq üçün ilk oyundakı 0:3 hesablı məğlubiyyətin əvəzini çıxmalıdır.

Qeyd edək ki, “Qalatasaray”ın uduzduğu “Əczaçıbaşı” CEV kubokunun 1/8 finalında “Azərreyl”ə rəqib ola bilər.