Misli Premyer Liqasında yeni mövsümün ilk oyunu olan "Araz-Naxçıvan"-"Qarabağ" görüşü Ağdam təmsilçisinin böyük hesablı qələbəsi ilə yekunlaşıb.
Apasport.az xəbər verir ki, oyundan sonra keçirilən mətbuat konfransında "Qarabağ"ın baş məşqçisi Qurban Qurbanov jurnalistlərin suallarını cavablandırıb:
- Elvin Cəfərquliyevin tez-tez qırmızı vərəqə alması psixolojidir, yoxsa istəkdəndir? Sanki əsas heyətdəki yerini də Toral Bayramova uduzub...
Hərəsindən bir az var. İstəklidir. Ən aktiv futbolçularımızdan biri olub. Hücumda çox iştirak edən oyunçu müdafiədə səhvlərə çox yol verir. Torala uduzub deyəndə, bir tərəfdən yaxşı haldır. İki oyun da cəzası var idi. Görünür ki, oyun praktikası azdır. Elvin idman formasını bərpa edən futbolçudur. Kartlara gəldikdə, daha çox düşünməlidir. Epizodlardan düzgün nəticə çıxarmalıdır. Get-gedə sayı çoxalır. Bir az problemə çevrilir. Qarşıdakı oyunlara baxacağıq. Belə hallar təkrarlansa, daha ciddi düşünməyimiz lazım olacaq.
- "Ludoqorets" haqda hansı fikirdəsiz?
- Canlı baxmışam oyunlarına. İki gün öncə onların oyununda idim, dünən gəlmişəm. 9 ildir ard-arda qruplarda oynayırlar. "Ludoqorets"in böyük təcrübəsi var. Çox bacarıqlı, fərdi ustalığı olan oyunçulara sahibdir. Çox sürətli oyun oynayırlar, hücumu yaxşı tamamlayırlar. Ciddi hazırlaşmağımız tələb olunur. Komanda oyunu öz yerində, fərdi və təkətək mübarizələrdə diqqətli oynamalıyıq. Bu, çox vacibdir. Əks-hücumların qarşısını almaq da vacibdir. Buna hazır olmalıyıq. Məşqçi də hiss olunur ki, bu oyunu tələb edir. Bir neçə kombinasiyaları var, bundan istifadə edirlər. Hamımız üçün maraqlı oyunlar olacaq. Ola bilər ki, çox güc sərf edək. Taktiki mübarizə də gedə bilər. Çox hazır olmalıyıq.
5-6 il əvvəl "Ludoqorets"lə iki yoxlama matçı keçirmişdiz.
- İndiki və əvvəlki komanda arasında fərq var?
- Tam fərqlidir. Yoxlama oyunlarında nəticəyə önəm vermirəm. Yoxlama matçlarında komandanın gücünü bilirsən. Həmin oyunlarda səhvlər çox olur. Futbolçular optimal formadan uzaq olurlar. Fərqləndirmək çətin olardı. 5-6 il əvvəlki futbolla indiki də bir deyil. Təcrübə də böyük rol oynayır.
- Niyə məhz özünüz bu oyunu izləməyə getdiz?
- Bu komandaya qarşı heç rəsmi matçda oynamamışdıq. Mənim üçün də maraqlı idi ki, "Ludoqorets" 9 ildir qruplarda çıxış edir. Həm "Ludoqorets", həm də "Dinamo" (Minsk) yaxşı komandadır. Bolqarlar ilk oyunda "Dinamo"ya qalib gəlsə də, Belarus klubu aqressiv oynamışdı. "Ludoqorets"in gücünü daha yaxından görmək üçün ora getmək qərarı verdim.
- Azarkeşlər sizə qruplarla bağlı mesaj verdi. Gücünüz çatacaq?
- Gücümüz var. Şükür Allaha gücümüz həmişə olub. Hər il çalışırıq ki, daha yaxşı hazırlaşaq. Bu, futboldur. İstənilən nəticə ola bilər. Bizim kimi digər rəqiblər də hazırlaşırlar, Bizim kimi ölkə klublarının da arzusudur ki, ÇL-də qruplarda iştirak etsinlər. Biz də istəklə işimizə davam edirik. Yaxşı nəticə üçün çalışırıq. Görək də, necə olacaq. Avrokuboklardakı digər klublarımıza uğurlar arzulayıram. Əfsuslar olsun ki, "Sumqayıt" uduzdu. Amma yaxşı oyunla uduzdu. Demək olar ki, böyük şansı var idi. Səfər matçında çox inamlı oynadılar. İnanırıq ki, gələn il daha yaxşı nəticələri olacaq. Özümüzə gəldikdə, vacib qələbə oldu. Rəqibi tam yaxından tanımırdıq. Əlimizdə rəqib haqda çox az məlumat var idi. Amma ümumən Elmarın oyun sistemindən xəbərdarıq. Keçənilki oyun sisteminə görə oyuna hazırlaşmışdıq. Futbolçularımı təbrik edirəm. 4:1 qələbə qazansaq da, çox bərk komandaya qarşı oynadıq. İlk görüş göstərdi ki, oyunlara çox ciddi yanaşmalıyıq".
- Qələbə qazansaz da, sanki narazı idiz. Hansı məqamdan?
- Oyundan narazı olmadım. Oyunçularımın bəzi epizodlardakı davranışından narazı idim.
Oxşar xəbərlər
Ana səhifə
Bütün xəbərlər
Hesabım