“Kəpəz”in legioneri, Premyer Liqada bir neçə klubun transfer siyahısında yer aldığı iddia edilən Junior Martins apasport.az saytına müsahibə verib.

- “Qarabağ”la görüşdə böyük hesabla uduzdunuz. Sizcə hesab niyə belə oldu?
- “Qarabağ” əla komandadır. Bunu hamı bilir, amma biz həmişə qalib gəlmək üçün oynayırıq, təəssüf ki, nəticə gözlədiyimiz kimi olmadı və böyük hesabla uduzduq.

- Birinci hissədə yaxşı mübarizə apardınız, ikinci hissədə bunu görmədik. Bunu nə ilə əlaqələndirirsiniz?
- Bəli, ilk yarı yaxşı keçdi. Lakin ikinci hissədə yorğunluq bir az bizə mane oldu. Ona görə də, belə alındı. 

- “Qarabağ”ın qarşısını almaq çox çətindir?
- Xeyr, bu o qədər də çətin deyil. Dediyim kimi, “Qarabağ”ın əla heyəti var. Amma futbolda hər şey meydanda həll olunur. Ən yaxşısını etməyə çalışanlar həmişə qalib gəlir.

- Mətbuatda çıxan xəbərlərə görə, Azərbaycanın bir neçə klubu, o cümlədən “Zirə” sizi istəyir. Yeni mövsüm karyeranda dəyişiklik edəcəksən?
- Bu barədə heç nə bilmirəm, heç bir məlumatım da yoxdur. Düzünü desəm, şəxsən mənimlə heç kim əlaqə saxlamayıb. İndi bu haqda heç düşünmürəm də. Diqqətimi qarşıdakı 8 tura cəmləmişəm və karyeram üçün daha yaxşı gələcək görürəm.

- “Qarabağ” mövsümün bitməsinə 8 tur qalmış çempionluğu rəsmiləşdirdi. Sona 8 tur qalmış komandanın çempion olması liqanın zəifliyindən xəbər verir?
- Xeyr, Azərbaycan çempionatı zəif deyil. Mənim üçün Azərbaycan Premyer Liqası çox yaxşı çempionatdır. Sadəcə, komanda sayı azdır. Halbuki, daha çox komanda olmalıdır. Daha çox komanda çempionluq uğrunda mübarizə aparsa, daha güclü və rəqabətli liqa olardı. Yeri gəlmişkən, “Qarabağ”ı sona 8 tur qalmış çempion olması münasibətilə təbrik edirəm.

- “Qarabağ” haqqında fikrin necədir? Onlar uzun illər Azərbaycan Premyer Liqasında hegemonluq edib, avrokuboklarda uğur qazanırlar. Bu cür komandada oynamaq istəyərdin?
- Əlbəttə ki, kim bu komandada olub, bu qədər titul qazanmaq istəməz? Kim Avropa Liqasında oynamaq istəməz? Hər bir oyunçu yüksək səviyyəli komandalarda oynamaq istəyir. Mən də həmçinin. Lakin dediyim kimi, indi bütün fikrim “Kəpəz”ə və qarşıdakı 8 oyuna köklənib.

- “Kəpəz”in Premyer Liqada qalacağına yəqin ki, inanırsan? Növbəti mərhələdə “Araz-Naxçıvan”la qarşılaşacaqsınız...
- Bəli, mən əminəm ki, “Kəpəz” Premyer Liqada qalacaq. Bunun öhdəsindən gələcəyimizə inanıram. Qarşıdakı turda “Araz-Naxçıvan”la üz-üzə gələcəyik. Həmin oyuna 100 faiz hazır olmağa çalışacağıq. İnanıram ki, hər şey istədiyimiz kimi alınacaq.