Digər komandalara gəldikdə, “Qarabağ” Ağdam təmsilçisi olsa da, məlum səbəbdən oyunlarını Bakıda keçirir. Premyer Liqanın debütantı NBC Salyan komandasıdır. Amma həmin rayondakı stadionu hələ tam hazır olmadığından bir müddət rəqiblərini paytaxtda və ya Sumqayıtda qəbul edəcək. Zaqatalanın “Simurq” klubunun nə məqsədlə yaradıldığı və hansı paytaxt komandasına xidmət etdiyi hamıya məlumdur. İndiyədək keçirilmiş bütün ölkə çempionatlarının iştirakçısı olan Tovuzun “Turan” komandası ciddi maliyyə problemləri ilə üzləşib. Bu səbəbdən “Turan”ın iddiasız klub olacağını artıq indidən güman etmək mümkündür. Hətta Qərb bölgəsinin yeganə təmsilçisinin çempionatı yarımçıq tərk etmək təhlükəsi də mövcuddur. Yevlaxa futbolu qaytaran “Karvan” da son iki mövsümdə zəif çıxışı ilə yadda qalıb. Yalnız Qəbələnin eyniadlı komandasını və “Xəzər-Lənkəran”ı iddialı əyalət təmsilçiləri sırasına daxil etmək olar. Ümumiyyətlə, növbəti mövsüm Premyer Liqada Gəncə, Sumqayıt, Mingəçevir, Naxçıvan, Şirvan, Quba kimi böyük və zəngin futbol ənənələrinə malik şəhərlərin komandaları mübarizə aparmayacaqlar. Əvəzində çempionatda cəmi 7 rayonumuz - Ağdam, Zaqatala, Tovuz, Lənkəran, Salyan, Qəbələ və Yevlax təmsil olunacaq.
Paytaxt klublarının çoxluğuna baxmayaraq, az sayda stadiondan istifadə olunacaq. Belə ki, nə az-nə çox, dörd komanda - “İnter”, “Olimpik”, “Standard” və MOİK “Şəfa” stadionundan yararlanacaq. “Neftçi” və “Bakı” rəqiblərini Tofiq Bəhramov adına Respublika stadionunda rəqiblərini qəbul edəcək. “Qarabağ”la yanaşı, “Bakılı” da Tofiq İsmayılov adına Suraxanı qəsəbə stadionundan istifadə edə bilər. NBC-nin isə Zabrat qəsəbə stadionunda məskən salacağı gözlənilir.
Əksər bölgələrimizdə səviyyəli futbol komandasının olmamasını təkcə paytaxtla regionlar arasındakı inkişaf göstəricisinin kəskin fərqlənməsi ilə izah etmək düzgün deyil. Çünki bölgə klubları sponsorlarının əksəriyyəti paytaxtda və ya xaricdə fəaliyyət göstərən təşkilatlardır. Bu baxımdan, digər imkanlı qurumların ən azı paytaxtdan 30 km aralıda olan Sumqayıtda futbola sərmayə qoyması problem yaratmamalıdır. Sadəcə, bölgələrimizin əksəriyyətinin Premyer Liqada təmsil olunmaması əksər regionlarda futbolun zəif inkişafının göstəricisidir. Bir vaxtlar çempionatımızda eyni zamanda Qərb bölgəsindən Tovuzla yanaşı, Gəncə, Şəmkir və Qazax da təmsil olunurdu. Amma indi həmin bölgə varlığı ilə yoxluğu bilinməyən “Turan”ın ümidinə qalıb. Eyni sözləri paytaxtın 150-200 km-liyində olan Şimal zonası haqda da söyləmək olar.
Regionlarda futbolun olmaması istedadlı oyunçuların tapılıb üzə çıxarılmasına da mənfi təsir göstərir. Belədə səviyyəli futbolçu qıtlığı yaranacaq. Yaxın müddətdə futbolumuzda irəliləyişin əldə olunacağını iddia edənlər görəsən, bu məqamları nəzərə alırlarmı?
Bu yerdə xalq şairi Bəxtiyar Vahabzadənin poemalarından birində “Kasıb gizlətməkçün yoxsulluğunu, itinin adını “Gümüş” çağırar” misrası yada düşür. Bir halda ki, son günlər it futbolumuzda ən mühüm fiqura çevrilib, çempionatımızın da “it günü”ndə olduğunu söyləmək mümkündür. Bunu təhqir mənasında yox, sözgəlişi dedim. Əsl həqiqətdə isə Azərbaycan çempionatı Premyer Liqa yox, Bakının açıq çempionatı adını daşımağa daha layiqdir.

• “Qalatasaray” 36-cı pillədə, “Qarabağ” “Beşiktaş”ı qabaqlayır
• "İnter" onunla müqavilə yeniləyəcək
• Livakoviçdən unikal nailiyyət
• "Qarabağ"ın rəqibindən darmadağın - VİDEO
• “Mançester Yunayted” yeni baş məşqçi axtarır