“Bakı” öndə, “İnter”lə “Simurq” pusquda, “Turan” həsrətdə

06.03.2009 - 12:36

Sabah Azərbaycan Premyer Liqasında XVII tura start veriləcək. Apasport.az saytının məlumatına görə, 30 aylıq fasilədən sonra liderliyə yüksələn “Bakı”nı evdə çətin sınaq gözləyir. Mükafatlara iddialı “Qarabağ” ötən həftə öz meydanında “Standard”a məğlubiyyətin əvəzini paytaxtın eyni adlı komandasından çıxmağa çalışacaq.

Ancaq nəzərə almaq lazımdır ki, makedoniyalı mütəxəssis Qyoko Hacıyevskinin yetirmələri ikinci dövrədə qələbələri sıralamaqla yanaşı, bir qol belə buraxmayıb. Onun Makedoniya yığmasını çalışdırdığı dövrdə rəhbərliyi altında oynamış Artim Şakirinin “Qarabağ”ın formasını geyindiyini nəzərə alsaq, müəlliminə rəqib olacaq. “Bakı” ilə “Qarabağ” arasında Tofiq Bəhramov adına Respublika stadionunda keçirilən oyunda sonuncu qol üç il əvvəl – 2006-cı il martın 12-də qeydə alınıb.

“Bakı”nın büdrəməsini liderliyi qaytarmaq iddiasında olan “İnter” gözləyir. Ancaq çempion ardıcıl ikinci görüşdə xal itkisindən sığortalanmayıb. Hər halda, “bankirlər” indiyədək “Qəbələ” ilə səfər matçlarında qələbə üzünə həsrət qalıb və ilk dövrədə həmişə bu uğursuz ənənə davam edib. İkinci dövrədə uğurla çıxış edən qəbələlilər hələ uduzmayıb.

Paytaxt təmsilçilərinin çətin sınaq qarşısında qalması, “Simurq”un liderliyə yüksəlmək şansını artırır. Düzdür, zaqatalalılar indiyədək məğlub edə bilmədiyi “Neftçi” ilə qarşı-qarşıya gələcək. Ancaq hazırda qüvvələr nisbəti dəyişib və evdə uğurla çıxış edən “Simurq” flaqmanla oyuna favorit qismində çıxacaq. “Neftçi”nin “Simurq”a icarəyə verdiyi millimizin yarımmüdafiəçisi Aleksandr Çertoqanov cəzalı olduğu üçün keçmiş komandasına qarşı oynamayacaq.

Ötən turda olduğu kimi, autsayderlərin görüşü də diqqət mərkəzində olacaq. “Muğan”a uduzan (1:2) “Turan” nəhayət, cari mövsümdə ilk qələbəsini qazanmalıdır. Hər halda, Tovuzda MOİK üzərində də qələbə qazanılmasa, Premyer Liqada qalmaq işi çox çətin olacaq.

7 mart

15:00. "Turan" - MOİK
Baş hakim: Elçin Məmmədov
Tovuz. Şəhər stadionu

15:00. "Qəbələ" - "İnter"
Baş hakim: Fariz Yusifov
Qəbələ. Şəhər stadionu

15:00. “Olimpik” – “Bakılı”
Baş hakim: Elçin Səmədli
Bakı. “Şəfa” stadionu

17:00. "Bakı" - "Qarabağ"
Baş hakim: Babək Quliyev
Bakı. Tofiq Bəhramov adına Respublika stadionu

8 mart

15:00. "Muğan" - "Xəzər-Lənkəran"
Baş hakim: Anar Salmanov
Salyan. Olimpiya İdman Kompleksinin stadionu

18:00. "Simurq" - "Neftçi"
Baş hakim: Azad Mütəllimov
Zaqatala. Olimpiya İdman Kompleksinin stadionu

18:00. "Standard" - "Karvan"
Baş hakim: Rövşən Əhmədov
Bakı. "Şəfa" stadionu

Turnir cədvəli

	komandalar	o	q	h	m	t	x
1	Bakı	16	12	2	2	37-6	38
2	İnter	16	11	4	1	31-9	37
3	Simurq	16	11	4	1	25-10	37
4	Xəzər-Lənkəran	16	10	3	3	30-12	33
5	Qarabağ	16	9	3	4	23-16	30
6	Olimpik	16	8	4	4	18-12	28
7	Karvan	16	8	2	6	20-14	26
8	Standard	16	7	2	7	14-17	23
9	Qəbələ	16	5	4	7	19-14	19
10	Neftçi	16	4	5	7	13-14	17
11	Bakılı	16	2	3	11	11-41	9
12	Muğan	16	2	2	12	11-31	8
13	MOİK	16	1	2	13	8-35	5
14	Turan	16	0	4	12	4-33	4