XVII Azərbaycan Premyer Liqasının son turu mükafatçıların tam siyahısına aydınlıq gətirib. Apasport.az saytının hesablamalarına görə, mükafatların 16-cı dəsti öz sahiblərini tapıb. Mükafat dəstinin çempionatın sayından az olmasının subyektiv səbəbi var. Məsələ burasındadır ki, 17 mövsümdən birində - 2001/02 mövsümündə yarış yarımçıq dayandırılıb.

2008/09 mövsümü isə yalnız bir yeni komandanın mükafat qazanması ilə əlamətdar olub. Bürünc medallara yiyələnən Zaqatalanın “Simurq” klubu tarixində ilk dəfə ən güclü 3 komanda sırasında yer almaqla, mükafat qazanmağı bacaran 14-cü komandaya çevrilib. Roman Pokoranın rəhbərlik etdiyi kollektiv mükafat sıralamasında 13-cü pilləyə şərik olub.

Çempionatı ikinci pillədə bitirən “İnter” ən azı iki dəfə ilk “üçlük”də yer alan 11-ci komandadır. Tarixində birinci dəfə gümüş medal qazanan “bankirlər” mükafat sıralamasında 7-8-ci pillələri bölüşdürür.

Tarixində 4-cü mükafatını əldə edən “Bakı” buna nail olan 6-cı komandadır. İkinci dəfə ölkə çempionu olan paytaxt futbolçuları medallarının əyarına görə 4-cü olan “Qarabağ”a çatıb. Bakılılar son 4 ildə üçüncü dəfə mükafatçılar sırasında yer alıblar.

Ötən ilki mükafatçılardan yalnız “İnter” ilk “üçlük”də qala bildi ki, onlar da qızılı gümüşə dəyişdilər. İndiyədək “Qarabağ” (1993), “Turan” (1993/94), “Neftçi” (1995/96), “Kəpəz” (1998/99) və “Şəmkir” (2000/01) çempion olduqdan bir il sonra ikinci yerlə kifayətlənmişdi.

Azərbaycan çempionatlarının bütün mükafatçıları

mövsüm	çempion	II yer	III yer
1992	“Neftçi” Bakı	“Xəzər” Sumqayıt	“Turan” Tovuz
1993	“Qarabağ” Ağdam	“Xəzər” Sumqayıt	“Turan” Tovuz
1993/94	“Turan” Tovuz	“Qarabağ” Ağdam	“Kəpəz” Gəncə
1994/95	“Kəpəz” Gəncə	“Turan” Tovuz	“Neftçi” Bakı
1995/96	“Neftçi” Bakı	“Xəzri” Buzovna	“Kəpəz” Gəncə
1996/97	“Qarabağ” Ağdam	“Neftçi” Bakı	“Xəzri” Buzovna
1997/98	“Kəpəz” Gəncə	“Dinamo” Bakı	“Şəmkir”
1998/99	“Kəpəz” Gəncə	“Şəmkir”	“Neftçi” Bakı
1999/2000	“Şəmkir”	“Kəpəz” Gəncə	“Neftçi” Bakı
2000/01	“Şəmkir”	“Neftçi” Bakı	“Viləş” Masallı
2003/04	“Neftçi” Bakı	“Şəmkir”	“Qarabağ” Ağdam
2004/05	“Neftçi” Bakı	“Xəzər-Lənkəran”	“Karvan” Yevlax
2005/06	“Bakı”	“Karvan” Yevlax	“Neftçi” Bakı
2006/07	“Xəzər-Lənkəran”	“Neftçi” Bakı	“Bakı”
2007/08	“İnter” Bakı	“Olimpik” Bakı	“Neftçi” Bakı
2008/09	“Bakı”	“İnter” Bakı	“Simurq” Zaqatala

Mükafatçı klublar

	komanda	qızıl	gümüş	bürünc	Cəmi
1	“Neftçi” Bakı	4	3	5	12
2	“Kəpəz” Gəncə	3	1	2	6
3	“Şəmkir”	2	2	1	5
4-5	“Bakı”	2	1	1	4
	“Qarabağ” Ağdam	2	1	1	4
6	“Turan” Tovuz	1	1	2	4
7-8	“İnter” Bakı	1	1	0	2
	“Xəzər-Lənkəran”	1	1	0	2
9	“Xəzər” Sumqayıt	0	2	0	2
10-11	“Karvan” Yevlax	0	1	1	2
	“Xəzri” Bakı	0	1	1	2
12	“Olimpik” Bakı	0	1	0	1
13-14	“Simurq” Zaqatala	0	0	1	1
	“Viləş” Masallı	0	0	1	1