“Üç il əvvəl “Qarabağ” Azərbaycan kubokunu qazananda çoxları bunu təəccüblə qarşılamışdı. Amma bu dəfə heyətimiz daha güclüdür”. Apasport.az saytının məlumatına görə, bu sözləri Ağdamın “Qarabağ” klubunun futbolçusu Azər Məmmədov deyib.

Mayın 23-də Azərbaycan kubokunun finalında “İnter”lə qarşılaşacaq ağdamlıların müdafiəçisi yenə mükafata sahib olmaq iddiasındadır. Azər 2006-cı ildə bu titula yiyələnən heyətdən komandada qalan 3 futbolçudan biridir. O, klubun rəsmi İnternet saytına açıqlamasında iddialı danışıb: “Bu mövsüm “Qarabağ” kuboka iddialıdır. Oyuna da yaxşı hazırlaşmışıq. “Qarabağ” avrokuboklarda çıxış etməyə layiqdir”.

Peşəkar karyerasını bitirmək üzrə olan Aslan Kərimov da üçüncü dəfə “Qarabağ”la kubok qazanmaq arzusundadır: “Çempionatdakı oyunumuzla avrokuboklara vəsiqəyə layiq olduğumuzu göstərmişik. İnanıram ki, kuboku qazanmaq taleyimizə yazılıb. Komandamız cari mövsümdə 2 dəfə “İnter”lə qarşılaşıb. Hər iki oyunda heç də rəqibdən pis oynamamışıq. Kuboku 3 ildən sonra yenidən başımız üzərinə qaldıracağımıza ümidvaram”.